Ditë më parë, në Velika Goricë të Kroacisë, në gjuhen kroate doli nga shtypi libri i Visar Zhitit "Poezi të zgjedhura" (Izabrane pjesme). Botues i këtij libri është Biblioteka e Qytetit Velika Goricë, Kroaci, ndërkaq e kanë botimin e kanë mundësuar Zhupania e Zagrebit, Ambasada e Republikës së Shqipërisë në Kroaci si dhe Këshilli i Pakicës Nacionale Shqiptare. Përzgjedhjen dhe përkthimin e poezive e ka bërë Smajl Smaka.

Në libër janë përfshirë 92 poezi, të sistemuara në pesë cikle: Robërit e lirë, Të faleminderit ylber, Ëndrrat e thyera, Një Diell tjetër dhe Ana tjetër e ditarit. Libri, që ka 137 faqe, me kopertina të forta, të plastifikuara, mbyllet me biografinë e gjerë të autorit,Visar Zhitit dhe me shënime biografike, gjithashtu të përkthyesit, Smajl Smaka.

Libri hapet me parathënien e z. Katja Matkoviq, Mikulçiq, drejtoreshë e Bibliotekës së Qytetit të Velika Goricës,si dhe me fjalën e rastit të shkrimtarit, redaktorit të librit Bozhidar Prosenjak "Libri mbi shpresën dhe lirinë".

Në parathënien e z Katja Matkoviq Mikulçiq, pos tjerash thuhet se cilësia e që buron nga secili varg,strofë,poezi është shumë motivuese. Duke lexuar poezinë e Visar Zhitit për disa çaste kam mbetur e heshtur,memece para disa vargjeve,"meqë pikëllimi futej në shpirtin tim,duke nënkuptuar nga ato vargje fatin e autorit,vuajtjet e pësimet e tij,por edhe fatin tragjik të vendit të tij,duke gjetur ngjashmëritë me vendim tim...:

Ndërkaq redaktori i librit,shkrimtari Bozhidar Prosenjak pohon se ka qenë i befasuar kur për herë të parë e ka takuar poezitë e Visar Zhitit dhe ka konstatuar: "kjo nuk është vetëm poezi shqipe! Kjo është edhe poezia ime ! Ky nuk është jeta dhe fati i një shqiptari,ky është njëkohësisht dhe fati im.Ndodhi një kthesë e rëndësishme. Vargjet e Zhitit më tërhoqën në botën e tyre. Rrëfimi i tij u bë rrëfimi im".

..Z.Prosenjak vazhdon:Para së gjithash,Visar Zhiti edhe pse këndon për veten e tij dhe për pësimet e tij, duke na i treguar plagët e freskëta në trupin dhe në shpirtin e tij, e bën këtë që realitetin të cilin na e sjellë para sysh, sa më bindshëm ta perceptojmë dhe ta përjetojmë sa më thellë...Por në qendër e fjalës së tij, të ndjeshmërisë së tij nuk është vet ai,,por njeriu pranë tij, bashkëvuajtësi i tij dhe bashkëvëllai i tij,i afërmi i tij, dhe më shumë se kaq-i tërë populli shqiptar,por edhe shumë më gjerë-unë e ti.

Prangat në duart e Zhitit nuk janë vetëm prangat e tij, por janë prangat e njeriut përgjithësisht...Autori na përkujton "se liria më shumë është gjendje shpirti sesa trupi"Zëri i këtij poeti sjellë dhimbjen e Shqipërisë,të një kohe të dhimbshme..Në thjeshtësinë e tij Visar Zhiti është poet kompleks,i thellë, shumështresor,plot shpirt. Ai të përvetëson me nivelet e mendimit të tij, me fisnikërinë e ndjenjave si dhe me aftësinë që të shprehet lehtë e fuqishëm pohon redaktori i librit Prosenjak.

Libri përmbyllet me mendimin se "përkthimi i këtij libri paraqet një hap në afrimin e kulturës kroate me atë shqiptare".