Ideja e themelimit të çmimit vjetor “Bekim Fehmiu”, për aktorin më të mirë nga Ministria për Kulturë, Rini dhe Sporte akoma mbetet të jetë vetëm një ide. Për këtë çmim që është menduar të nderohet aktori i mirënjohur shqiptar, Bekim Fehmiu tashmë i ndjerë, pat premtuar ministri i Ministrisë për Kulturë, Rini dhe Sporte, Lutfi Haziri, me rastin e vdekjes së aktorit të madh shqiptar, Bekim Fehmiu, më 15 qershor të këtij viti.

“Po, ideja për themelimin e këtij çmimi qëndron dhe është duke u punuar në këtë drejtim”, ka thënë ministri Lutfi Haziri për gazetën “Zëri”, i cili ka njoftuar se brenda MKRS-së tashmë është duke punuar një grup i njerëzve se çfarë do të përmbajë ky çmim.

“Kam themeluar një grup punues brenda ministrisë dhe në bazë të këtij punimi do të hartohet edhe çmimi “Bekim Fehmiu”, ka thënë Haziri.

Mirëpo, deri në ndarjen e këtij çmimi, aktorët kosovarë duhet të presin deri në vitin e ardhshëm, pasi që, brenda këtij viti nuk do të ndahet ky çmim. Se kush do të jetë aktori i parë që do të nderohet me këtë çmim, mbetet të pritet.

“Brenda këtij viti nuk do të ndahet ky çmim, pasi që nuk është gati ideja e propozuar. Vitin tjetër do ta ndajmë çmimin “Bekim Fehmiu”, ka thënë Haziri.

Çmimi “Bekim Fehmiu”, do të ndahet nga Ministria për Kulturë, Rini dhe Sporte, mirëpo, sipas Hazirit ky çmim do ti besohet një nga festivalet ekzistuese që këtë çmim më pas ta ndaj tradicionalisht. “Një nga festivalet e filmit në Kosovë do të gëzojë të drejtën e dhënies së këtij çmimi. Nuk dihet se cili festival do ta marrë këtë të drejtë, pasi që grupi punues do të punojë edhe në këtë drejtim”, ka thënë Haziri.

Se çfarë kritere duhet plotësuat për përvetësimin e këtij çmimi, do të mësojnë më pas festivalet ekzistuese të filmit në Kosovë, siç janë: “Prifilmfest”, “Dokufest”, “Shqipfilmfest”, ...

Në anën tjetër, edhe përkundër faktit se brenda këtij viti nuk është ndarë ky çmim që u pat premtuar para disa muajve, ministri i MKRS-së, Lufi Haziri ka thënë për gazetë se që nga vdekja e aktorit të madh shqiptar, Bekim Fehmiu, të gjitha ngjarjet kulturore të zhvilluar brenda Kosovës, por edhe jashtë kanë pas pjesë me të cilën kanë kujtuar jetën dhe veprimtarinë e këtij aktori që ka jetuar dhe vepruar në Beograd të Serbisë, por që ka prek edhe botën përmes filmave që ka realizuar me aktorë të mirënjohur të kohës së tij.

“Pothuajse të gjitha festivalet ekzistuese në Kosovë, por edhe aktivitetet e tjera kulturore kanë kujtuar jetën dhe veprimtarinë e Bekim Fehmiut. Edhe në kuadër të 100 vjetorit të lindjes së Nënës Terezë që po shënohet në Kosovë, është menduar të kujtohet ky aktor i madh shqiptar”, ka thënë Haziri.

Në anën tjetër, pas vdekjes tragjike të aktorit Bekim Fehmiu, edhe festivale dhe aktivitete të ndryshme kulturore të shteteve të huaja kanë kujtuar këtë aktor, duke e kujtuar edhe Festivalin Ndërkombëtarë të Filmit në Sarajevë, të cilët, hapjen e edicionit të fundit e kanë bërë me prezantimin filmit “Mbledhësit e puplave”, ku Bekim Fehmiu ka bartë rolin e një romi.

Bekim Fehmiu, i lindur më 1 qershor të vitit 1936 në Sarajevë të Bosnjë e Hercegovinës, ka arritur të jetë shumë i suksesshëm në arenën e kinematografisë botërore, për të luajtur në shumë filma me figura të njohura të filmit. Aktori Bekim Fehmiu është një nga emrat më të dëgjuar shqiptarë të aktrimit. Ai është bërë i famshëm me filmin "Unë kurrë nuk kam parë ciganë të lumtur", në vitin 1966. Deri në atë kohë, ai kishte studiuar dhe ishte bërë i njohur nga shumë shtëpi filmi nëpër botë. Ai është aktori i parë shqiptar i filmit dhe i teatrit, i cili ka luajtur me sukses në filmat dhe skenat e gjithë hapësirës së ish-Jugosllavisë. Ka qenë një nga personalitetet që ka lënë gjurmë në kinematografinë ballkanike, por mbi të gjitha, ai është i madh për kontributin artistik në kinematografinë botërore. Rolet e tij në "Prova speciale", "Odiseja", "Aventurieri", "Rruga", "Vitet e nxehta", "Dezertori", përmenden si kryevepra. Bekim Fehmiu është vetëvrarë më 15 qershor të këtij viti në banesën e tij në Beograd.