13-vjetori i vdekjes së Nënë Terezes, që është shënuar të dielën me përurimin e Katedrales me emrin “Nëna Tereze”, ka shërbyer për bashkimin e njerëzve pa dallim feje, qëndrimi politik apo etnie. Ashtu sikurse ka qenë misioni i saj gjatë jetës, edhe mesha e shenjtë e së dielës ka ndikuar që të mbledhë në hapësirat e katedrales përfaqësues të institucioneve më të larta shtetërore të Kosovës, të ndërkombëtareve, përfaqësues të kishës katolike, përfaqësues të fesë islame dhe shumë të pranishmëve të tjerë.

Edhe para familjarëve të Nënë Terezes, mesha e së dielës e udhëhequr nga i dërguari i Papës së Vatikanit, Papa Benediktit të XVI-të, arqipeshkvit nga Tivari, Zef Gashi, Nënë Terezen, humanisten dhe nobelisten me famë botërore e ka quajtur krenari të kombit shqiptar.

Duke kujtuar fjalët e Papa Gjon Palit II, se Nëna Tereze është nga Kalkuta, por bijë e popullit shqiptar, Zef Gashi përmes lutjeve fetare ka porositur për ngjasimin me Nënën e Madhe të Botës.

Ndërkohë, kryetari i Parlamentit të Kosovës, Jakup Krasniqi në këtë ceremoni të inaugurimit të Katedrales ka shprehur kënaqësinë që si përfaqësues i Legjislativit të Kosovës, të jetë i pranishëm në 100-vjetorin e lindjes së Nënë Terezes.

“Kjo Katedrale, që qëndron madhështore në qendër të kryeqytetit të Kosovës, në Prishtinë, është simbol i fesë katolike, i bashkëjetesës, i humanizimit dhe i tolerancës fetare që e karakterizon kombin tonë që nga lindja e tij. Ky tempull i besimit do të shërbejë si shtëpi e paqes dhe e dashurisë për njëri-tjetrin, si shtëpi e tolerancës ndaj diversitetit, e përkujdesjes për të pambrojturin dhe të vobektin, e paqes dhe e respektit ndaj jetës - reflektim i veprës së Nënë Terezes”, ka thënë Krasniqi, duke shtuar se misioni i saj përkujtohet me nderim të veçantë.

“E shenjtë është Nëna Tereze, po aq i shenjtë është edhe dinjiteti njerëzor që me përkushtim e besim mbrojti ajo. Ky jubile e gjen Kosovën në një situatë krejtësisht tjetër nga periudha kur Nëna Tereze e vizitoi Kosovën për herë të fundit, në vitin 1996, kur u shpall edhe qytetare e nderit. Përkushtimi i Nënës Tereze duhet të na nxisë të gjithëve që sipas shembullit të filozofisë së saj ta japim kontributin për paqen, tolerancën, mirëbesimin dhe për dashurinë ndaj njeri-tjetrit”, ka vijuar më pas Krasniqi.

“Shëmbëlltyra e shenjtë e Nënë Terezes më shtyn të kërkoj nga komunitetet tona fetare dhe krerët e këtyre komuniteteve, të bashkëpunojnë, të krijojnë dhe të forcojnë ura komunikimi ndërmjet tyre dhe besimtarëve të tyre, të kontribuojnë për eliminim e frymës se urrejtjes, të mosdurimit dhe të mungesës së tolerancës. Ata, duhet të ushqejnë nëpërmjet mesazheve fetare frymën e vëllazërimit, të tolerancës, të respektit, të mirësjelljes dhe të dashurisë për njëri-tjetrin, angazhimin për një shoqëri e shtet të të gjithëve, modern, evropian, për një Kosovë, në të cilën besimi, liritë fetare, qytetare, progresi, siguria, mirëqenia dhe solidariteti të bëhen pasuri dhe përgjegjësi e të gjithëve”, ka thënë Krasniqi.

Inaugurimin e Katedrales e ka përshëndetur edhe myftiu, Naim Tërnava, i cili, ka kujtuar veprën e madhe të Nënë Terezes, anekënd botës.

Ndërkohë, në shënimin e 100-vjetorit të lindjes së Nënë Terezes, që po mbahet edhe në Kosovë me vendim të presidentit të Republikës së Kosovës, Fatmir Sejdiut, pat përfshirë në fillim edhe rikthimin e një relikti nga mbetjet tokësore të trupit të Nënës Terezë, prej varrit të saj në Kalkuta të Indisë, që besohet se do të do të jetë një proces që do të vazhdojë.

Kurse sipas Ipeshkvisë së Kosovës, katedralja “Nëna Terezë”, përveç nevojave fetare, do ta ketë edhe një qendër kulturore, e cila do të shërbejë për aktivitete kulturore e shkencore të institucioneve shtetërore, universitare, e kulturore të Kosovës, ndërkaq hapësira e brendshme e saj do të mund të shfrytëzohet edhe nga orkestra e Filarmonisë Opera e Kosovës për koncertet e saj festive.