Ceremoni lutjesh të veçanta dhe buqeta me lule u ofruan sot përpara varrit të bamirëses së madhe shqiptare, Nëna Tereze në Kalkuta të Indisë, në 13-vjetorin e vdekjes së saj.

Duke kujtuar murgeshën e njohur në mbarë botën për misionin e saj të veçantë, besimtarët dhe adhuruesit e saj zhvilluan homazhe në varrin e saj që ndodhet pikërisht atje ku Gonxhe Bojaxhi kaloi pjesën me të madhe të jetës në Kalkuta të Indisë.

“Sot do të ketë një meshë të madhe në qendër të qytetit. Megjithatë, unë vendosa të vij dhe të kaloj disa momente lutjeje në shtëpinë e motrave të Nënë Terezes, duke u lutur për ndihmën e saj” u shpreh at Brajeni në Indi.

Nena Tereze, e cila vdiq më 5 shtator të vitit 1997, në moshën 87-vjeçare, njihet gjerësisht si shenjtore e të braktisurve për dashurinë dhe përkushtimin e jashtëzakonshëm për të varfëritë, të pastrehët dhe të sëmuret.

Papa e shenjtëroi bamirësen e madhe shqiptare në muajin tetor të vitit 2003, duke i hapur rrugën kanonizimit te saj.

Nëna Tereze mbërriti në Indi në vitin 1929, në moshën 18-vjeçare, ndërsa u bë nënshtetasja e këtij vendi në vitin 1948, duke e kaluar pjesën më të madhe të jetës në Kalkuta të Indisë.

Për shërbimin e saj ndaj më të varfërve, Gonxhe Bojaxhi ka marrë një sërë çmimesh mes të cilave, çmimin Xhon F. Kenedi, në vitin 1971 dhe Çmimin Nobel për Paqen, në vitin 1979.