Teatri Kombëtar për këtë vit ka nisur përgatitjet që skena e tij ti përgjigjet veprimtarive që kanë në qendër frymën kombëtare, por në projektet e këtij viti nuk mbeten pas dhe nismat për të rinjtë e artit skenik. Me fondin publik për të rinjtë, Teatri Kombëtar propozon që të organizohet Festivali i Rrugës.

Ky fond, i akorduar prej shtatë vitesh nga Ministria e Kulturës, menaxhuar nga institucioni teatror, mendohet se ka hyrë në ngërç dhe nuk sjell më risi. Emrat e regjisorëve që konkurrojnë po dublohen dhe në këtë formë që ishte novatore për nisjen, po përsëriten në detaje shfaqjet e Teatrit Kombëtar, ndërsa po e njëjta punë bëhet dhe nga Teatri i Metropolit.

“Prandaj, dalja nga korniza dhe drejtimi i të rinjve për një formë alternative të artit skenik, shpresojmë se do të ngjallë interes dhe do të ketë efekt të përnjëhershëm te artistët e rinj. Quhet i rrugës pasi skena tashmë nuk do të jetë e vendosur brenda ambienteve të Teatrit Kombëtar, por në sheshet e Tiranës”, shkruhet në projektet e këtij viti të Teatrit Kombëtar, të cilat presin dhe vendimin e MTKRS.

Sheshet ku do të zhvillohet ky festival do të jene ato të cilat bashkia ka ndërmend të inauguroje për vitin 2012. Ky aktivitet synon që ta bëjë teatrin sa më popullor dhe ta çojë atë sa me pranë publikut të gjerë. Pranë Teatrit Kombëtar bëjnë të ditur se nëse ky projekt do të marrë miratimin e ministrisë, festivali do të jetë një risi pasi asnjëherë më parë nuk është organizuar diçka e këtij rangu në vendin tonë.

Po ashtu propozohet që ky projekt i festivalit të shtrihet edhe në qendra tregtare, pasi eksperienca europiane ka treguar se organizimi i shfaqjeve teatrore brenda qendrave tregtare ka qenë shume i suksesshëm dhe diçka e tille do të ishte shumë interesante po të aplikohej edhe në kryeqytet. Në fakt festivali për të rinjtë ka qenë një nga veprimtaritë, i cili është mirëpritur nga të rinjtë edhe pse gjithmonë është kërkuar të ketë dhe më shumë fonde, por tashmë duket se ky projekt nuk do të jetë më dhe do t’ia lërë vendin këtij festivali, i cili shkon në hapësira të tjera.