Qeveria e Republikës së Kosovës ka vendosur që të nxjerrë kuletën e të paguajë të gjitha shpenzimet edhe nëse do të jenë të një kostoje të lartë, vetëm që të mos “koriten” në shënimin e 100-vjetorit të Republikës së Shqipërisë.

Shasivar Haxhijaj, këshilltar i ministrit të Ministrisë së Kulturës, Rinisë dhe Sporteve, Memli Krasniqit, ka thënë se nuk duhet që t’iu ikë një ngjarje e nivelit kaq të lartë, duke pasur parasysh 100-vjetorin e pavarësisë së Republikës së Shqipërisë.

“Nuk duhet që të na ikë kjo ngjarje, nëse do ta neglizhonim një shënim të tillë, atëherë duhet të presim edhe 100 vjet të tjera. Dhe për shënimin e saj edhe si Qeveri por edhe si Ministri jemi të gatshëm që të mos kursehemi dhe të paguajmë angazhimin, sepse çdo angazhim kushton”, ka thënë Haxhijaj, i cili ka shtuar se është shumë herët të kalkulohet shuma e festës së 28 Nëntorit. Nga ana tjetër, çështjen materiale ai e ka vlerësuar të jetë minore në krahasim me kontributin e popullit kosovar, të cilët janë angazhuar para 100 vjetëve në pavarësimin e Shqipërisë. “Prandaj, me këtë rast nuk duhet të peshohen gjërat”, ka thënë Haxhijaj.

Por një entuzizaëm i tillë nuk ka ekzistuar edhe në përpilimin e datave të festave zyrtare në Republikën e Kosovës. Festa e 28 nëntorit nuk gjendet në listën e festave zyrtare të shtetit dhe pagesat e majme për një festë që nuk gjendet as në kalendarin zyrtar duhet edhe të arsyetohen në një mënyrë. Haxhijaj për këtë dilemë ka pasur një përgjigje. “Festa e 28 Nëntorit është festë kombëtare, është festë e të gjithë shqiptarëve kudo që jetojnë. Edhe sipas ligjit, kjo festë shënohet si festë kombëtare”, ka thënë Haxhijaj, duke mos e specifikuar mënyrën se si do të arsyetohet shpenzimi i mjeteve për këtë festë që nuk është në listën zyrtare të festave.

“Mirëpo, nuk do të thotë që lista zyrtare e festave do të qëndrojë e njëjta edhe në vitet ardhshme. Edhe ajo mund të ndryshojë në vitet në vijim”, ka thënë Haxhijaj, duke aluduar në futjen e 28 Nëntorit për festë zyrtare të Republikës së Kosovës.

Se do të festohet 28 Nëntori edhe nga ana e institucioneve kososvare në gjysmën e muajit janar, nuk është potencuar nga zyrtarët e MKRS-së.

“Jo që nuk kemi dashur ta festojme, por kemi pritur bashkëpunimin me Republikën e Shqipërisë. Pas vizitës së ministrit të Ministrisë së Kulturës nga Republika e Shqipërisë, Aldo Bumci, tashmë e kemi të qartë se ne bashkë me Shqipërinë do të koordinojmë aktivitetet për shënimin e kësaj feste”, ka thënë Haxhijaj.

Sipas tij, pas takimit të dy të parëve të kulturës nga Kosova dhe Shqipëria pritet hartimi i listës së aktiviteteve që do të ndiqet nga të dy shtetet.

“Përgjegjësinë e kësaj feste e ka Shqipëria, mirëpo edhe ne do të japim kontributin tonë në shënimin e kësaj feste. Kemi caktuar 10 shkurtin si datë kur edhe do të bëhet e ditur lista e aktiviteteve që do të ndiqet nga të dy vendet”, ka thënë Haxhijaj, sipas të cilit, fillimisht do të emërohen përgjegjësit e këtij manifestimi nga të dy vendet e më pas do të emërohen edhe grupet punuese në të dy vendet.

Ndërkohë, se nëse është gjetur e papërgatitur Republika e Kosovës në shënimin e kësaj feste Haxhijaj ka kundërshtuar duke specifikuar se në të njëjtin nivel janë me shtetin shqiptar sa i përket organizimit të kësaj feste.

Ministria për Kulturë, Rini dhe Sporte e Republikës së Kosovës, nëpërmjet Haxhijajt ka njoftuar se të gjitha institucionet kulturore që kanë varshmëri nga MKRS janë të gatshme t’i përgjigjen ftesës për performanca të ndryshme, por, sipas tij, një ftesë e tillë do t’u bëhet të gjithë drejtorëve të institucioneve kulturore gjatë ditëve në vijim, që të shihet nëse kanë edhe ata ndonjë ide për mënyrën e festimit në mënyrë sa më profesionale dhe të denjë të 28 Nëntorit. Por, nuk është akoma e qartë se nëse do të angazhohen edhe komunat e Kosovës, nëpërmjet institucioneve kulturore në shënimin e kësaj date të madhe të popullit shqiptar.