Me konceptin kuratorial: S’është e thënë që gjithnjë të jetë e bukur, përveç nëse është e bukur, Galeria e Arteve të Kosovës ka hapur konkursin për çmimin “Musli Mulliqi”, pas një viti mungese të tij. Konkursi i sivjet do të jetë i mbikëqyrur nga dy kuratorë të huaj: Charles Esche, Galit Eilat.

Të drejtë konkurrimi kanë krijuesit nga fusha e pikturës, skulpturës, grafikës, instalacionit, fotografisë, videos dhe performancës, ndërsa tema punimeve për këtë ekspozitë është “Shqyrtimi i metaforës se Kaleidoskopit dhe të fshehurave të tij”. Ekspozita do të na ofrojë një mundësi për të parë se çfarë nënkuptojmë me "forma të bukura" në shekullin XXI dhe në realitetet përreth nesh.

Pa dyshim, format që do të prezantohen do të jenë të llojllojshme. Por e përbashkëta e tyre do të jetë kombinimi i realizmit dhe të imagjinueshmes – një farë fantazie shkenore, e cila do të na kthejë prapa te shpikja origjinale e Brusterit dhe te ndërlidhja e kësaj të fundit me fotografinë. Kaleidoskopi gjithashtu shërben si metaforë për mënyrën e fragmentuar se si ne e përjetojmë botën bashkëkohore. Ai nuk prodhon bukuri të rëndomtë por, përmes copëza të përziera dhe të ngrira, krijon një bukuri të përkohshme, artificiale dhe të izoluar.

Në ekspozitë do të marrin pjesë rreth 25 artistë, gjysma e të cilëve do të jenë nga Kosova dhe gjysma tjetër të huaj. Ata do të marrin pjesë me imazhe, aksione, platforma apo video, të cilat përbëjnë copëza të një tërësie më të madhe.