Janë kthyer në Kosovë si triumfues, por gjatë kohës sa kanë qëndruar në SHBA, thonë se ka triumfuar Kosova. Ekipi i filmit tashmë më të famshëm kosovar “Kthimi” mendojnë se pas kësaj fitore një ditë do Kosovës do t’ia sjellin edhe Oscar-in, në mos me këtë film me ndonjë tjetër. “Po kam menduar shpesh, mendoj se edhe pas këtij filmi, edhe unë edhe Blerta do të jemi shpesh në këtë prag.

Unë e di shumë mirë kur në duar kam një projekt që ka brum prej fituesi, e di edhe kur nuk e kam. Ne një ditë do të sjellim Oscar në Kosovë, a është kjo 2013-ta apo më vonë, mbetet të shihet”, ka thënë producenti i këtij filmi, Blerim Gjoci. Momentin kur e kanë kuptuar se janë fitues Gjoci thotë se nuk mund ta shpjegoj dot. “Reagimi mund te ketë qenë krejt irracional, më duket se kam frikësuar njerëzit rreth meje, aq fort kam bërtitur. Ne fituam atë që e ka ëndërr çdo krijues filmi.

Është një kënaqësi që është përtej shpjegimit, të fitosh “Sundance” është një nderë që të përcjell gjatë gjithë jetës, është një vulë kualiteti që nuk e shkund dot, prej tani e tutje mjafton një fjalë për të prezantuar veten”, është shprehur Gjoci. Sipas producentit Gjoci filmi përveç që është pëlqyer shumë nga publiku po ashtu edhe nga kolegët të cilët ishin në konkurrencë. “Për filmin “Kthimi” mund të thuhet se askënd nuk e ka lënë të pandikuar të paktën.

Në aeroportin e “Salt Lake City”, duke u kthyer në Kosovë, mua më ndalen një çift, sepse më thanë që kanë nevojë të thonë se sa u ka lënë përshtypje filmi, e lëre më në Park City ku mbahej Festivali, ku shumë njerëz në rrugë më ndalnin për të më uruar. Unë personalisht mendoj se në ato dite të festivalit, Kosova triumfoi”, ka përfunduar Gjoci. Nga ana tjetër regjisorja blerta Zeqiri thotë se vetëm pjesëmarrja në këtë festival ishte sukses në vete e lëre më marrja e çmimit.

“Unë për vete, nuk guxoja të shpresoja për çmim, në mënyrë që të mos dëshpërohesha nëse nuk do të fitoja. Edhe pse gjatë shfaqjes së filmit e pamë që filmi ishte pëlqyer shumë nga publiku, prapëseprapë nuk mund t’i dija preferencat e jurisë. Për këtë arsye, fitorja më zuri të papërgatitur dhe në ato momente nuk mund të mendoja shumë duke u munduar të mos qaja.

Vetëm pas një dite më duket që e kuptova se çfarë na kishte ndodhur me të vërtetë”, është shprehur Zeqiri duke shtuar se ky çmim nuk do ta kishte rëndësinë e vetë nëse nuk do ta kurorëzonte me punë të mëtejshme me filma të metrazhit të gjatë. Sipas saj komenti më i shpeshtë që ka qenë pas shfaqjes së filmit është se “filmi ka qenë shumë i fuqishëm” dhe “na ka bërë të ndjejmë me peripecitë në të cilat kanë kaluar personazhet e filmit”.

Në këtë mënyrë këtij filmi i hapet rruga për të konkurruar për çmimin prestigjioz Oscar gjë e cila sipas Blertës mund të hapë shumë mundësi. “Normalisht që më ka ndodhur të ëndërroj për Sundanc dhe Oscar. Konkurrimi për Oscar është një gjë shumë e madhe dhe mund të hapë shumë rrugë e mundësi për të punuar në filma të gjatë.

Megjithatë, filmat që janë shpërblyer në Sundance i kam pëlqyer më shumë sa i përket vlerave artistike, derisa ata të çmimit Oscar më janë dukur më komercialë”, ka thënë Zeqiri. Kjo nuk është hera e parë që Zeqiri paraqitet në skenat botërore të filmit, pasi që filmat e saj kanë marrë pjesë në mbi 40 festivale ndërkombëtare të filmit, ku edhe janë shpërblyer shumë herë. “Sundanc” është themeluar nga aktori i famshëm amerikan Robert Redford dhe njihet si festivali më i madh i filmit të pavarur në SHBA. Mbahet çdo vit në Park City, Utah.