Komuna e Prishtinës shumë shpejt do të ketë zëvendësimin për Mustafë Halilin, tanimë ish- shef i sektorit të kulturës në kuadër të komunës. Halili i cili për dy mandate gjegjësisht katër vite ishte shef i këtij sektori, thotë se gjatë kohës së “sundimit” të tij, u vërejtën ndryshime për të mirë në mbarëvajtjen e kulturës në vendin tonë.

“Ka pasur avantazhe dhe përparim të madh, gjithashtu duke mos harruar edhe investimet kapitale të cilat kanë rritur rëndësinë dhe mbajtjen e aktiviteteve kulturore, si për fëmijë ashtu edhe për të rritur” shton Halili. Shpesh duke cekur se me 65 vitet që gëzon ishte koha që t`ia lëshonte vendin dikujt tjetër, Halili nuk ka asnjë vërejtje për konkursin e nxjerrë nga Komuna. Ai thotë se mbetet aktiv në këtë institucion, por vetëm me ndonjë projekt specifik.

“Do të vazhdoj të jem aktiv deri në një afat të caktuar, me ndonjë projekt më të veçantë por edhe me njerëzit që do më kërkojnë”, shton Halili, mandati i të cilit me kontratë ka përfunduar në ditën e fundit të vitit 2011.

Në anën tjetër, Komuna e Prishtinës ka dalë të jetë fort e shpejtë në kërkimin e shefave të rinj. Në fundvitin e kaluar, ajo ka shpallur konkurse për shumë pozita brenda saj, pasi shumë prej shefave u ka skaduar kontrata. Në mesin e tyre, konkurs është shpallur edhe për shefin e sektorit të kulturës i cili do të punojë 40 orë në javë dhe do të ketë primatin e sektorit kulturor në këtë drejtori, duke menaxhuar projektet kulturore në bashkëpunim me drejtorin e Drejtorisë.

Derisa Vlora Dumoshi, drejtoreshë e Drejtorisë për Kulturë, Rini dhe Sport në Komunën e Prishtinës, thotë se ka pasur mbi 25 aplikime dhe se intervistat do të fillojnë në mesin e javës tjetër, disa burime konfidenciale të gazetës“Zëri” thonë se intervistat nuk do të ndodhin fare dhe se i tërë konkursi është shtyrë për muajt e ardhshëm. Sipas Dumoshit, tek në mesin e javës tjetër do fillojnë edhe intervistat, dhe nuk ka asgjë të vërtetë në shtyrje të mundshme të konkursit.

“Të mërkurën pritet të fillojnë intervistat. Pyetjet veç janë gati dhe synojmë të zgjedhim personin adekuat që do t’i përshtatet kësaj pozite. Për këtë është angazhuar edhe një komision special i cili do të bëjë vlerësimet finale. Këtë herë ligji na obligon të bëjmë testin me shkrim dhe atë me gojë” thotë Dumoshi, duke shtuar se shefi i ri i sektorit të kulturës në kuadër të komunës do fillojë punën në fillim të muajit mars.

Merret vesh gjithashtu se në konkurs kanë aplikuar edhe persona të cilët tanimë janë në pozitat drejtuese të disa institucioneve kulturore, duke qenë se në muajt mars, prill dhe maj, shumë prej tyre do t`iu përfundojnë kontratat në vendet e tyre përkatëse.