Nga foltorja ku po promovohej ribotimi i librit të tij “Gjarpinjtë e gjakut”, shkrimtari Adem Demaçi foli pak për librin e më shumë dha mesazhe politike, të cilat bënë që politikanëve të pranishëm t’u ndërrojë ngjyra e fytyrës. “Ju që jeni të veshur me pushtet mos i shitni interesat e Kosovës, mos luani me kufijtë e Kosovës, jemi në kohë kozmike, punët po shkojnë shumë shpejt, kështu që të kemi kujdes mos të luajmë me interesin kombëtar.

Sot nuk po kërkohet të vdesim për Kosovën, por po kërkohet të flijohen kolltuqet dhe karriget tona”, ka thënë Demaçi para të pranishmëve. Në 55 vjetorin e botimit të parë të këtij libri dhe në ribotimin e tetë të tij, Demaçi tha se meritat për atdhetarinë që posedon e që e kanë shtyrë të shkruajë këtë libër janë të nënës së tij dhe të mësueses së parë. Për librin “Gjarpinjtë e gjakut”, të cilin Demaçi e kishte shkruar në moshën 21- vjeçare e që ka për temë fenomenin e gjakmarrjes në trevat shqiptare, u tha që është roman me vlera të larta artistike.

Ndërsa autorin e librit kryetari i Parlamentit të Kosovës, Jakup Krasniqi e vlerësoi si simbol të rezistëncës të luftës për çlirim komëbtar. “Pavarësisht faktit se ka shumë mendimtarë e teoricienë letrarë që na bindin se vepra letrare është një kreaturë që bën jetë të pavarur nga autori, le të më lejohet të shfaq mospajtimin tim, së paku kur bëhet fjalë për Demaçin dhe veprën e tij.

Në fakt, kur u botua ky roman, më 1958, hyri në botën time të fëmijërisë, pa i mësuar akoma mirë shkronjat, së bashku me emrin e autorit. Nuk vonoi shumë dhe e morëm vesh faktin se derisa autori ishte në burg, romani “Gjarpinjtë e gjakut” tashmë kishte hyrë në indeksin e “materialit subversiv” – për UDB-në”, ka thënë Krasniqi. Nga ana tjetër, zëvendëskryeministri i Kosovës Hajredin Kuçi tha se një libër i tillë duhet të dalë përtej kopertinave të tij në mënyrë që të bëhet shfaqje teatrale ose film.

“Përmes kësaj vepre baca Adem e ka hapur një plagë të shoqërisë sonë, ka qenë frymëzim në kohën e pajtimit të gjaqeve, por unë mendoj se në këtë kohë frymëzimi më i mirë do të ishte që kjo vepër të bëhet në formë të dramës ose të filmit, për të cilën Qeveria e Kosovës do të jepte maksimumin e saj. Njerëzit e rezistencës kombëtare identifikohen me emrin dhe veprën e tij”, është shprehur Kuçi. Akademik Rexhep Qosja ka thënë se perceptimi i këtij libri është përtej ribotimit të tij.

“Ky roman është lexuar aq shumë jo vetëm për shkak të rëndësisë së temës por edhe sepse ishte lexuar si roman i ideologut të lirisë dhe pavarësisë së Kosovës. Tema e gjakmarrjes është trajtuar gjithmonë nga autorë të ndryshëm madje edhe të huaj, po trajtohet edhe sot por ata lexues e studiues që kanë lexuar këtë libër të Demaçit dhe libra të tjerë me këtë temë mund të thonë se Adem Demaçi e ka trajtuar krejt ndryshe sepse është më origjinal”, ka thënë Qosja.

Para të pranishmëve foli edhe zëvendësministri i Kulturës, Hajdin Abazi, i cili tha se “autori i kishte kuptuar para të gjithëve se një komb pa hequr dorë nga konfliktet e rënda ndërfamiljare nuk mund të aftësohej për të luftuar të keqen e ardhur nga jashtë”. Ky libër është ribotuar nga Këshilli i Rinisë Europiane të Kosovës dhe shtëpia botuese “Buzuku”.