Eros Ramazzotti, këngëtari italian nuk do të jetë më 30 korrik në Prishtinë. Kështu të paktën thotë faqja zyrtare e këngëtarit italian, ku Prishtina, e cila ka figuruar deri në ditët e fundit si dita e performancës së Ramazzottot në kryeqytetin më të ri të botës, është larguar. Sipas kësaj faqe, data e radhës që ka mbete valide është ajo e 31 gushtit që parashihet të jetë në Zvicër.

Mirëpo, nuk është shenja e vetme që këngëtari italian ka anuluar koncertin. Se nuk janë duke u bërë përgatitjet në Stadiumin e Kryeqytetit për një koncert të përmasave botërore ka konfirmuar edhe Afrim Muqiqi, nënkryetar i KF Prishtina.

“Në adresë të Stadiumit të Kryeqytetit, më 20 korrik kemi pranuar një shkresë nga sekretari permanent i Ministrisë për Kulturë, Rini dhe Sporte, Sali Morina, e cila ka vërtetuar se MKRS si mbështetës i koncertit të Eros Ramazzottit, ndan një shumë prej 15 mijë eurove, gjë që është vërtetuar me kontratë në mes Stadiumit të Kryeqytetit dhe MKRS-së”, ka thënë Muqiqi.

Po sipas tij, mjetet e ndara që i bënë valide edhe kontrata akoma nuk janë derdhë në konto, por, sipas Muqiqit, kontrata e vërteton se për një gjë të tillë janë të obliguar dhe se beson se këto mjete do të ndahen.

“Këto mjete janë ndarë për shkak se koncerti është dashtë të mbahet nën patronazhin e ministrit të Ministrisë për Kulturë, Rini dhe Sporte, Lutfi Hazirit, gjë që e ka obliguar organizatorin që stadiumin ta kthej në gjendje të njëjtë ashtu sikurse edhe do ta pranonte”, ka thënë Muqiqi.

Mirëpo, organizatorët e këtij koncerti “Ubboss”, janë zhdukë nga faqja e dheut. Pos që nuk kanë shkuar të nënshkruajnë kontratën mes tyre dhe Stadiumit të Kryeqytetit, Armenda Filipaj, udhëheqëse e këtij organizimi, ka tri ditë që nuk ka hapë telefonat për medie.

Muqiqi, po ashtu ka konfirmuar për gazetën “Zëri”, se më datën 21 korrik, Armenda Filipaj ka shkuar dhe është takuar me Afrim Muqiqin, ku i është ofruar asaj një kontratë që do ta obligonte për përgjegjësitë e mbajtjes së koncertit. “Ajo ka marrë kontratën me vete të cilën nuk e ka nënshkruar. Sipas rregullave, ajo është dashtë që më 22 korrik të nënshkruaj kontratën dhe po atë ditë ti marrë çelësat e Stadiumit të Kryeqytetit, mirëpo, as njërën dhe as tjetrën nuk e ka bërë. Prej asaj dite ajo nuk është lajmëruar. Nuk di se për çfarë koncerti profesional bëhet fjalë kur asnjë përgatitje nuk është bërë. Dy ditë para koncertit nuk ka shenja se do të ketë koncert”, ka thënë Muqiqi.

Në anën tjetër, se para për një koncert komercial janë dhënë nga Ministria për Kulturë, Rini dhe Sporte, është vërtetuar edhe nga një burim i “Zëri”t. Sipas burimit tonë, mësohet se mjetet nuk janë ndarë nga departamentet e kulturës, por, duket që ka shkuar si sponsor për mbajtjen e këtij koncerti.

Për këtë çështje ka qenë e pamundur të flitet me ndonjë zyrtarë brenda ministrisë, për shkak të mos posedimit të qasjes në telefon.

Ndryshe, stendat që kanë figuruar deri në ditën e djeshme nëpër kryeqytetin e Kosovës, për shitjen e biletave për koncertin e Eros Ramazzottit, janë avulluar. Stadiumi i Kryeqytetit është i paraparë që të grumbullojë mbi 16 mijë njerëz, dhe nëse bazohemi në këtë shifër, stendat do të duhej të ishin edhe më tutje nëpër rrugët e Prishtinës, pasi që, sipas deklaratës së fundit të Filipajt, deri së voni janë shitur mbi 10 mijë bileta. Se çfarë do të ndodhë me paratë e qytetarëve të cilët kanë dhënë për këngën italiane, prej 20 deri 50 euro, mbetet të shihet.