Dhimitër Xhuvani, Agim Qirjaqi, Bekim Fehmiu dhe Tinka Kurti, në mbrëmjen e së dielës janë nderuar me çmimin e karrierës në edicionin e tretë të Festivalit Ndërkombëtar Veror të Filmit në Durrës. Tinka Kurti është aktorja që ka marrë këtë çmim për së gjalli, ndërkaq tre të tjerët janë kujtuar për karrierën e tyre.

Më pas, edicionin e tretë të këtij festivali që numëron filma të përzgjedhur nga anekënd botës, e ka hapë filmi "La Vie En Rose" (2007), i regjisorit francez Oliver Dahan. Aktorja Marion Cotillard rrëfen për dy orë jetën e personazhit të jashtëzakonshëm të shekullit të njëzet, e një zëri të dashur të muzikës franceze, Édith Piaf (1915-1963). Jeta e një gruaje, me nënë të alkoolizuar, që e preku famën shumë herët, por gjithë jetën shoqërohet nga alkooli dhe dhimbjet e zemrës.

Festivali Ndërkombëtar i Filmit në Durrës, ka bërë disa seksione ku do të zhvillojë aktivitetet e ndryshme në kuadër të festivalit. Në këtë edicion do të prezantohet edhe filmi “Dosja K”, apo “Dossier K”, i regjisorit të njohur flaman Jan Verheyen që flet për shqiptarët dhe flamanët dhe i realizuar nga aktorë belgë, ku një ndër rolet kryesore e bart aktori shqiptar, Blerim Destani.

Pos filmit “Dosja K”, që prek kanunin shqiptar, në këtë edicion do të vijnë edhe filmat me tematikë shqiptare si: "Hi dhe gjak" (2009) i aktores franceze Fanny Ardant, që është bazuar në një nga veprat e shkrimtarit tonë, Ismail Kadaresë, si dhe filmi i seksionit ballkanik “Besa”, të regjisorit serb Srdjan Karanoviq.

Ndërkohë, në mesin e aktorëve që do të jenë prezent në këtë edicion, pos Blerim Destanit, në festival do të jenë prezent edhe: Fanny Ardant, Turkan Aoray, regjisori polak, Krzysztof Zanussi, Jan Harlan, Henning Lohner, ...

Ndërkohë, juria ndërkombëtare kryesohet nga regjisori kosovar Isa Qosja, dhe anëtarët: producentin rumun Daniel Burlac, aktoren turke Inci Demirkol, kritikun ndërkombëtar Phillip Bergson dhe aktorin italian Enrico Lo Verso. Çmimi i kritikës jepet nga juria e kryesuar nga zv/presidentja e FIPRESC-it, Alin Tasçiyan. Juria ndan çmimet “Gladiatori i Artë”, për filmin më të mirë, regjinë më të mirë, aktorin dhe aktoren më të mirë, çmimi për filmin më të mirë ballkanik. Ndërkohë për herë të pare jepet në këtë edicion çmimi i kritikës (FIPRESCI) dhe çmimi i publikut.