Mijëra fansa të zhgënjyer të grupit “Metallica” kanë thyer karriget dhe kanë shqyer posterët në Nju-Delhi, pasi organizatorët anuluan koncertin e grupit legjendar. Agjencia e lajmeve Press Trust of India raporton se policia ka arrestuar katër persona nga kompania që ka organizuar koncertin, me akuzën për mashtrim të njerëzve, të cilëve u desh të presin me orë të tëra për koncertin e muzikës “heavy metal”.

Organizatorët kanë thënë se koncerti është anuluar si pasojë e vështirësive teknike, ndërsa anëtarët e “Metallicas” kanë premtuar rikthim të parave për ata që kanë blerë biletat. Koncerti ishte pjesë e argëtimit në kuadër të garës për Çmimin e Madh të Indisë në Formula 1.