Kryeministri Sali Berisha ka vizituar Institutin e Arkeologjisë në kryeqytet ku ka parë nga afër statujën e zbuluar së fundmi në Apoloni.

Arkeologët mendojnë se kjo mund të jetë statuja më e veçantë e zbuluar në Mesdhe, ndërsa për vendin tonë është statuja më e rëndësishme zbuluar në 50 vjetët e fundit. Bëhet fjalë për bustin e një atleti që i përket periudhës romake, në gjysmën e dytë të shekullit të dytë të erës sonë.

"Një kryevepër e gjenisë krijuese në skulpturën e të gjitha kohërave. Ky zbulim ka vlera të jashtëzakonshme, në rrafshin krijues artistik, në rrafshin historik", tha Berisha.

Statuja e atletit romak u zbulua nga ekspedita shqiptaro-franceze zhvilluar ne Apoloni në sektorin e vilës romake. Kryeministri Berisha premtoi angazhimin e qeverisë për të fuqizuar mbështetjen e saj në fushën e arkeologjisë, si dhe për të rritur bashkëpunimin me vendet mike për të zhvilluar të tjera ekspedita të kësaj natyre. (TCH)