Futboll.Është e pamundur që në kryendeshjet e Superligës së Kosovës, veçmas kur takohen Besa dhe Prishtina, në Pejë, të mos kemi ndëshkime të futbollistëve me karton të kuq.

Kështu ndodhi edhe të dielën, kur gjyqtari kryesor i takimit Muhedin Ferati, një javë më parë i shpallur si gjyqtari më i mirë i javës së parë, me sugjerimin e anësorit Musa Rrahimi, përjashtoi nga loja sulmuesin e Prishtinës, Faton Zejnullahu.

Arsyetimi që u dha nëpër media për rastin Zejnullahu, nuk është edhe gjithaq i besueshëm, prandaj as arsyetimi i gjyqtarit kryesor të takimit Muhedin Ferati, nuk qëndron, se për Zejnullahun e vetmja zgjidhje ka qenë kjo, ndëshkimi me karton të kuq!!!

Një gjë është e qartë. Gjyqtarët e prishën kryendeshjen dhe e dëmtuan futbollin. Prishtina mbeti 70 minuta me një lojtar më pak në fushë, për fyerjen të cilën Zejnullahu ia paska drejtuar anësorit Musa Rrahimi! Natyrisht, vetëm kontakti apo diskutimi me gjyqtarin anësor, nënkupton ndëshkim me karton të verdhë.

Raste të tilla ndodhin kudo nëpër ligat evropiane. Mirëpo, ndëshkimi drejtpërdrejt me karton të kuq i Faton Zejnullahut, në minutën 20 të takimit, është një vendim i ngutshëm e pse jo edhe i qëllimshëm, vetëm e vetëm që të prishej baraspesha në fushë, siç pati ndodhur edhe disa herë, ndaj Prishtinës dhe pikërisht në stadiumin “Shahin Haxhiislami” në Pejë.

Me këtë rast ne nuk po e kontestojmë në asnjë mënyrë fitoren e Besës, e cila mbase do të mund të fitonte edhe po qe se Prishtina do të luante e kompletuar, mirëpo, me këtë rast gjyqtarët ranë në provim dhe Musa Rrahimi e meritoi kartonin e kuq, duke dëshmuar se nuk është i denjë të ndaj drejtësinë në një kryendeshje siç është ajo ku takohen Besa e Prishtina.

Kartonin e kuq e meritoi edhe gjyqtari kryesor Muhedin Ferati, i cili nuk e di a ra pre e kurthit të Musa Rrahimit apo, ndëshkimin e Zejnullahut e bëri në përputhje me rregulloret në fuqi!!!

Edhe analizat që u bënë pas ndeshjes Besa –Prishtina, nuk dëshmuan fajësinë e sulmuesit të Prishtinës, madje, të gjithë ata që e njohin futbollistin, si trajneri i Trepçës, Gani Sejdiu, theksojnë se Faton Zejnullahu është njëri nga futbollistët më të qetë dhe më korrekt në elitën e futbollit të Kosovës.

I tillë ishte edhe sa ishte në skuadrën tjetër kryeqytetase, në Flamurtar. Zejnullahu nga drejtuesit e Prishtinës, nuk u angazhua për të treguar “aftësitë” e tij të kundërshtimeve me gjyqtarë, ngase skuadra bardhekaltër, asnjëherë nuk ka qenë e interesuar që të angazhojë futbollistë që polemizojnë e kacafyten me gjyqtarët!

Këtë e dinë edhe gjyqtarët që vazhdimisht ndajnë drejtësinë në ndeshjet që i zhvillon Prishtina, prandaj kështu duhet të jetë edhe më Zejnullahun, i cili erdhi si futbollist cilësor, për të dëshmuar vlerat e tij në skuadrën më me nam të Kosovës.