Federata Evropiane e Futbollit, UEFA, është deklaruar se nuk ka diskutuar fare kërkesën e Federatë së Futbollit të Kosovës (FFK), që përfaqësueses së saj t’i mundësohet zhvillimi i ndeshjeve ndërkombëtare me kombëtare të tjera dhe ekipe. Lajmin e ka konfirmuar ekskluzivisht për “Zëri” zyra e medieve e UEFA-së, vetëm një ditë pas përfundimit të punimeve të Komitetit Ekzekutiv të saj.

“Asgjë nuk është diskutuar për Kosovën. Kosova nuk ka qenë pjesë e agjendës dhe as në mbledhjen e komitetit ekzekutiv nuk është diskutuar për të”, tha një zëdhënës i UEFA-së në bisedë telefonike.

Ai pranoi se kjo është çështje e ndjeshme. “Kjo është një çështje e ndjeshme dhe si e tillë sigurisht se do të diskutohej në një nivel të lartë të UEFA-së, sikur që është vetë Komiteti Ekzekutiv i saj, por në këtë mbledhje nuk është diskutuar kjo çështje”, tha ai.

Në muajin dhjetor, Federata Botërore e Futbollit (FIFA) në mbledhjen e komitetit të saj ekzekutiv në Tokio të Japonisë kishte marrë vendim që kërkesën e Kosovës t’ia drejtojë Federatës së saj kontinentale, në këtë rast UEFA, kështu ishte raportuar edhe nga FFK-ja në saje të letrës që kishte dërguar presidenti i FIFA-së, Sepp Blatter. Megjithatë, në mbledhjen e Komitetit Ekzekutiv të UEFA-së të udhëhequr nga vetë presidenti i saj, Michel Platini, që është mbajtur më 24 dhe 25 janar në selinë e saj në Nyon të Zvicrës, asgjë nuk është diskutuar për Kosovën.

Mbledhja e ardhshme e KE të UEFA-së është më 20-21 mars në Stamboll të Turqisë, e cila më pastaj përcillet me kuvendin e rregullt vjetor të UEFA-së, që mbahet po ashtu më 22 mars në Stamboll. “Ndoshta në mbledhjen e ardhshme të Komitetit Ekzekutiv që është në Stamboll, mund të futet në rend të ditës diskutimi i rastit dhe kërkesës së Kosovës”, tha ai.

Mbetet të shihet nëse do të ndodhë kjo apo jo deri në datën e sipërpërmendur të takimit të ardhshëm të KE-së së UEFA-së, deri atëherë sikur edhe në 20 vitet e fundit, futbollistët e Kosovës vazhdojnë të kërkojnë të drejtën e tyre legjitime për të luajtur ndeshje ndërkombëtare.

Nga FFK-ja kanë konfirmuar të enjten pasdite se nuk kanë marrë asnjë informacion në lidhje me takimin në Nyon. Ndonëse UEFA është treguar më e rezervuar se FIFA në komunikim me FFK-në deri më tani.