Federata Shqiptare e Futbollit (FSHF) është gjobitur me 15 mijë euro për shkak të thirjeve “Shqipëri Etnike” të një grupi të vogël të tifozëve shqiptarë në ndeshjen e 10 nëntorit në stadiumin “Niko Dovana” të Durrësit.

Fjala është për ndeshjen e ekipeve përfaqësuesese Shpresa apo U-21 (deri 21 vjeçarëve) mes Shqipërisë dhe Rusisë, kur një grup tifozësh kuqezi shpalosi hartën e Shqipërisë etnike dhe bëri thirrje për ta realizuar këtë ide ndërkohë që hodhi edhe disa materiale piroteknike në fushë. Delegati grek i ndeshjes, Evangelis Mazarakis, ka fotografuar gjithçka dhe materialin e ka paraqitur në Komitetin Disiplinor të UEFA-s, i cili ka marrë një vendim të ashpër kundër FSHF-së: 15 mijë euro gjobë, për çfarë FSHF ka kohë të ankohet brenda pesë ditëve.

“Po, jemi gjobitur me 15 mijë euro për ndeshjen e Shpresave Shqipëri-Rusi. Arsyeja zyrtare e këtij vendimi është për thirrje nacionaliste nga ana e tifozëve, për vendosjen e pankartave me sfond të njëjtë, por edhe për hedhjen e materialeve ndezëse në fushë. Gjithçka ishte dokumentuar nga vëzhguesi grek i ndeshjes që nuk ka bërë një relacion dashamirës për ne”, konfirmoi dje një zyrtar i FSHF-së.