Mafia në vitin e kaluar kishte trokitur në dyert e Serie A. Njerëz të klanit mafioz nga Bari kishin pritur futbollistët para shtëpive të tyre, kishin hyrë edhe nëpër zhveshtore, kishin bërë presion dhe kërcënime, duke ofruar edhe para për të kurdisur rezultatet e disa ndeshjeve të futbollit në Serie A: së paku katër ndeshje, ka pranuar të mërkurën ish mbrojtësi i Barit, aktualisht te Atalanta, Andrea Masiello.

Dëshmia e këtij futbollisti mbahet si sekrete sepse ka të bëjë me disa persona të tjerë të përfshirë në këtë skandal, siç kanë shkruar në dekretin e tyre prokuratorët Antonio Laudati dhe Ciro Angelillis.

Historia e bastëvënieve në vitet e fundit në Itali themelin e saj e ka në Bari. Dhe pikërisht në Bari policia italiane shpreson që ta shkatërrojë këtë zinxhir të mafiozëve.

Masiello tashmë ka folur, ka pranuar gjithçka lidhur me kurdisjen e ndeshjeve nga skuadra e Barit që tani garon në Serie B. Jo rastësisht deklarata e tij është cilësuar si një dëshmi e një të penduari të mafisë. Masiello dhe avokatët e tij e kanë ditur vetëm 30 minuta më parë se do të mirreshin në pyetje. Të martën kanë fjetur në Lecce pasi që kishin ardhur me aeroplan nga Brindisi për ti ikur syrit të tifozëve. Kanë drekuar në Salento, dhe më pas përmes telefonit i është thënë se ku duhej të takohej me hetuesit italianë të cilët do ta merrnin në pyetje.

Ishin marrë vesh të takoheshin në autostradën e Barit, atje po i priste një makinë e karabinierëve. I kanë përcjellë deri në prokurori. Katër orë marrje në pyetje para prokurorit, Angelillis dhe para njerëzve të Repartit operativ të Karabinierëve. Masiello ka pranuar se ka qenë pjesë e kurdisjes së ndeshjes kundër Palermos (që nuk u jetësua pasi Miccoli kishte huqur penalltinë) sepse kishte frikë. Ka treguar gjithashtu se disa miq të nga Bari e kishin këshilluar të ketë kujdes, pasi do të kishte punë me njerëz të rrezikshëm. Këta mafiozë dy herë kishin shkuar te shtëpia e Masiellos dhe i kishin dhënë një shumë prej 80.000 eurosh (më pas ua kishte kthyer pasi kishte dështuar kurdisja e ndeshjes me Palermon).

Këta mafiozë njëjtë kanë vepruar edhe me futbollistët e tjerë të Barit. Masiella ka rrëfyer edhe për faktin se nuk është kurdisur vetëm një ndeshje. Këta mafiozë ishin paraqitur edhe para ndeshjes me Chievon ( që Bari e humbi 2:1), me Romën (Bari humbi në shtëpi 2:3) dhe me Sampdorian (0:1).

Masiellon e kishin këshilluar që të mos angazhohej shumë në fushë në këto ndeshje, pasi që futbollistët e tjerë tashmë kishin pranuar ofertën e këtyre mafiozëve.

Masiello e ka njohur edhe një foto të një sllavi (rom), të cilin e kishte parë para ndeshjes Lazio – Genoa.

Prokuroria e Barit tani në defterin e saj ka edhe disa emra të tjerë të futbollistëve, mbrojtësit Belmonte dhe portierit Padelli, por ka edhe shumë emra të tjerë që dyshon se janë të përfshirë në këtë skandal dhe ka eedhe disa emra të zyrtarëve të skuadrave. Hetuesit italianë janë të bindur që në këtë skandal bastëvëniesh janë të përfshirë edhe skuadra tjera, në shënjestër është sidomos ndeshja Parma – Bologna. Masiello gjatë ditëve në vijim do të ketë një takim edhe me prokurorin federal, Stefano Palazzi, ku do të rrëfejë edhe përfshirjen e bashkëlojtarëve të tij për disa ndeshje të tjera që dyshohet se janë kurdisur. Duket se ky është vetëm fillimi. Do të ketë edhe shumë emra të tjerë futbollistësh të dyshimtë dhe futbolli italian mund të dridhet edhe me një Calciopoli tjetër.