Shpresa vdes e fundit. Kjo do të jetë logoja e KEK-ut në pjesën pranverore të Superligës së Kosovës, kur ekipi nga Kastrioti do të bëjë çmos për të rujatur statusin elitë në futbollin kosovar. Pas pjesës së parë të garave ekipi kastriotas radhitet në pozitën e fundit, me 15 pikë, me një ngecje prej katër pikëve nga ekipet që gjenden në zonën e sigurt, por që për njërin prej lojtarëve më të mirë dhe më me përvojë Mensur Simnica nuk është e paartishme.

“Jemi mbrapa të tjerëve, por nuk do të thotë se gjërat nuk mund të ndryshojnë në favorin tonë në pranverë. E vërtetë se jemi katër pikë nga ekipet që janë jashtë zonës së rrezikshme, por janë distancë e pikëve që mund të arrihet”, tha Simnica. Lojtarët e KEK-ut janë përballur me shumë të këqija para fillimit dhe gjatë këtij sezoni.

Kanë qenë lojtarët më pak të paguar nga të gjithë të tjerët dhe menzi që edhe i kishin filluar stërvitjet, por kjo nuk i ka penguar në asnjë çast që të luftojnë dhe ruajnë nderin e tyre. “Prej fillimit të sezonit jemi ballafaquar me gjithçka, që ka bërë të luajmë tërë kohën nën stres dhe presion të madh. Mirëpo, me gjithë tërë këto të këqija kemi dalë në terren dhe kemi luftuar për çdo pikë.

Kur shikohet rezultati ynë në vjeshtë, duke bërë krahasime me ekipet tjera, është pozitiv. Jemi të fundit por dallimi mes ekipeve që luftojnë për mbijetesë është i arritshëm”, shtoi Simnica. Mesfushori 30-vjeçar shprehet se të gjithë në klub janë duke ia bërë hyzmetin dhe me padurim e presin vazhdimin e kampionatit, edhe pse ai mund të jetë jo i mirë për ta. “Të gjithë në klub i dimë vështirësitë që i kemi dhe çka na pret në pranverë, por asnjëri nuk ankohet në asgjë.

Atmosfera është jashtë zakonisht e mirë, e kjo na mundëson që të punojmë mirë dhe jemi sa më të gatshëm para sfidave që na presin”. Simnica thotë se beson në çudi, por më tepër në besimin dhe punën që është duke e bërë më bashkëlojtarët e tij. “Do të ishte çudi të shpëtonim, por t’u them të drejtën më tepër besoj në punën dhe besimin që kemi të gjithë lojtarët, se në fund do t’i gëzohemi mbetjes në Superligë”.

KEK-u deri më tashti një herë nuk ia ka dalë t’i shpëtojmë rënies në rang më të ulët dhe nuk do të ishte katastrofë që kjo të ndodhte sërish. “Jemi të gatshëm për gjithçka dhe mund të presim gjithçka deri në fund të kampionatit. Askush nuk na ndalon që të mos e çojmë deri në fund misionin e shpëtimit dhe ma merr mendja se askush nuk do të kritikojë nëse nuk ia dalim.

Me rëndësi është që të luftojmë dhe të mos dorëzohemi derisa ekziston një shpresë”, tha Simnica. KEK-u tashmë ka fillur përgatitjet nën drejtimin e trajnerit të ri, Fetah Veliu, derisa një pjesë të tyre do ta kryejë jashtë Kosovës, në Durrës, ku pritet të qëndrojë dhjetë ditë.