Skuadra e Malit të Zi, Bar, është “viktima” e radhës për futbollistët e Prishtinës në Ulqin, ku ekipi prishtinas po i kryen përgatitjet për vazhdimin e kampionatit. Bari është mposhtur me rezultat 2:0 me golat që i kanë shënuar Enis Fetahu e Fitim Llapashtica.

“Ndonëse ishim të lodhur nga ndeshjet e mëparshme dhe nga mbrëmja muzikore, që për skuadrën tonë e kishte organizuar Afrim Muçiqi, futbollistët sikur mposhtën lodhjen dhe me lojë të pëlqyer kanë shënuar fitore kundër Barit”, tha ndihmëstrajneri, Sami Sermaxhaj.

E veçantë e kësaj ndeshjeje është se në portën e Prishtinës, gjatë tërë ndeshjes ishte portieri i ri dhe tejet i talentuar, Alban Muçiqi, i cili ende nuk i ka mbushur 16-vjeç dhe nuk mbahet mend që një portier në moshë të tillë të paraqitet në portën e seniorëve. Për Albanin ishte kjo paraqitja e tij e parë në një ndeshje me fanellën e Prishtinës. Kryetrajneri i Prishtinës, gjermani Jerat, duke lavdëruar portierin tha se “më vjen shumë mirë që edhe në këtë ndeshje Prishtina nuk pësoi gol”.

Disa nga futbollistët e përbërjes së parë që u paraqitën në ndeshjet e mëhershme, kundër Barit morën pushim. Prishtina në këtë ndeshje u paraqit me këtë përbërje: Muçiqi, B. Krasniqi, Makolli, Haxhaj, Bsh. Ahmeti, Gavazaj, Sejdiu, Be. Ahmeti, Kozhani, Zejnullahu dhe Shabani. Luajtën edhe Kukaj, Llapashtica, D. Krasniqi, Uka. G. Begolli, Gr. Begolli, Latifi, Fetahu, Kosumi e Mazrekaj. B. Berisha