Afati kalimtar dimëror i futbollistëve do të shënojë përfundimin e tij në shumicën e kampionateve evropiane në fund të ditës së martë (sot).

Deri më tani janë realizuar disa kalime dhe ka pasur mjaft fjalë, spekulime e dita e fundit edhe mund të sjellë risi për futbollistët shqiptarë që janë në lëvizje.

TË KËRKUARIT – Ndër më të kërkuarit në këtë afat kalimtar padyshim se janë mesfushorët e Baselit, Xherdan Shaqiri e Granit Xhaka dhe sulmuesit, Hamdi Salihi (Rapid Vjena) e Erjon Bogdani (Cesena), por edhe të tjerë.

Emri i Shaqiri të Zhegrës është shqiptuar ndër shumë skuadra evropiane, por duket se “kaparin” për të do ta japin bavarezët e Bayern Munichut me kusht që të marrin shërbimet e tij në qershor, si edhe ndodh zakonisht me gjermanët që kërkojnë të kryejnë punët nga fillimi i stinorit. Kësaj i ka ndihmuar edhe mohimi që i ka bërë futbollisti ofertës milionëshe nga Bosfori me ngjyrat kuqeverdhë të Galatasarayit.

Xhaka është kërkuar me ngulm nga Hamburg SV, pasi që trajneri i kësaj të fundit (Thorsten Fink) njeh mirë kualitetet e tij.

TË KRYERAT – Kalimi më i rëndësishëm në këtë afatkalimtar është padyshim ai i Admir Mehmedit nga Zurichu drejt Dinamo Kievit për një vlerë të përgjithshme prej 15 milion euro.

Agon Mehmeti pas disa viteve në Suedi me fanellën e Malme FF zbriti në Sicili për të bartur uniformën e Palermos. Në Itali te Sampdoria përfundoi edhe Shkodran Mustafi nga Evertoni anglez.

Ferhan Hasani shënoi edhe një transferim të bujshëm nga Maqedonia, duke lënë Shkëndijën e Tetovës për Wolfsburgun, ku e pret një sfidë e madhe.

Grasshoppersi mori dy shqiptar, Taulant Xhakën dhe Sehar Fejzullahin, në tentim për të përmirësuar imazhin në futbollin helvetik.

MUNDËSITË – Janë disa futbollist shqiptar edhe në ditën e fundit të afatit kalimtar mund të ndërrojnë klubin.

Enis Alushi ka oferta nga Bundesliga I dhe II, Alban Ramaj sipas Bildit është afër kalimit të Jahn Regensburg, deri sa Alban Meha pritet të përcillet nga afër deri në verë prej disa skuadrave të njohura.

Salihi është me valixhe në dorë dhe duket se tashmë ka prenotuar një biletë për Peking dhe mendjen e tij mund ta ndërojnë vetëm skocezët.

Bogdani vazhdon të jetë “brand” për Serie A dhe i kërkuar nga disa skuadra, duke ia ndihmuar kësaj edhe pakënaqësitë që ka te Cesena largimi i tij duket i pashmangshëm.

VLERËSIMI – Menaxheri shqiptar i licencuar i transferimeve, Enver Raça pohon se ka ngritje të kartonit të futbollistit shqiptar. “Reklamën më të mirë të mundshme për talentin e futbollistit shqiptar në përgjithësi janë duke e bërë ata që i kemi Zvicër.

Tash pas Behramit e Xhemajlit, janë Shaqiri, Xhaka e Mehmedi që po tregojnë se ka të talentuar në mesin tonë dhe ka filluar të shtohet interesimi për futbollistët shqiptar sidomos nga Kosova”, tha ai. “Jam i bindur se tani e më shumë do të jetë më lehtë për futbollistët nga Kosova të kalojnë në skuadra të huaja, sepse këta djem po i bëjnë një reklamë të mirë të gjithëve”.

PAK BASHKËPUNIM – Për dallim nga vitet e fundit, vërehet një bashkëpunim i vogël ndërmjet ekipeve dhe futbollistëve të Shqipërisë e Kosovës, madhe edhe ndaj ekipeve shqiptare tw Maqedonisë.

Nuk është shënuar ndonjë kalim i veçantë në këtë trekëndësh. A është në pyetje ngritja e nivelit të futbollit kosovar dhe pagesave të saj (fakt që le për të dyshuar) apo ka shënuar ngritje vet kampionati shqiptar e ai maqedonas duke u pasuruar kërkesa.