Ekspedita e Prishtinës pritet që sonte në orët e vona të kthehet nga Ulqini ku për dymbëdhjetë ditë ka kryer përgatitjet për stinorin pranveror dhe ka zhvilluar disa ndeshje kontrolluese me skuadrat që janë duke u përgatitur në këtë vend të përshtatshëm klimatik.

Pas katër fitoreve dhe një barazimi, nga ndeshjet e deritashme, të gjithë sikur kanë fituar bindjen për një Prishtinë të fuqishme. Megjithatë, testin më të vështirë dhe më kryesorin, të zgjedhurit e gjermanit Wolfgang Jerat do ta kenë sot në orën 14:30, kur pritet të fillojë ndeshje miqësore kundër skuadrës së njohur polake Lodz, e që do të japë përgjigjen se sa në të vërtetë janë përgatitur futbollistët e Prishtinës, të cilët janë lider pas pjesës vjeshtore në superligën e Kosovës dhe mëtojnë që aty të mbeten edhe pas përfundimit të edicionit.

“Jemi të ndërgjegjshëm se ndeshja e sotme do të jetë më e vështirë nga të gjitha që i kemi zhvilluar në Ulqin, pasi për kundërshtar kemi një skuadër të njohur nga Polonia, futbollistët e së cilës kanë shumë stërvitje në këmbët e tyre.

Kjo nuk do të thotë se ne dorëzohemi, përkundrazi si në çdo ndeshje Prishtina edhe sot kërkon fitore, Prishtina është skuadër me mentalitetin fitues dhe këtë do të mundohemi ta dëshmojmë edhe në këtë ndeshje”, tha dje pas stërvitjes së paradites, kryetrajneri i Prishtinës, Wolfgang Jerat.

Në pyetjen se a ndiejnë lodhje futbollistët për shkak të orarit të ngjeshur të stërvitjeve, por edhe të numrit të madh të ndeshjeve brenda një kohe të shkurtër, Jerat tha: “Natyrisht se ndihet lodhja, por kjo është normale pasi jemi në fazën e përgatitjeve”.

Gjermani nuk ka vendosur ende se cilët futbollistë të Prishtinës do ta fillojnë ndeshjen kundër polakëve, duke thënë se “është herët të përcaktohemi për 11-ën e parë pasi kemi edhe stërvitjet e pasdites, pastaj edhe nesër (sot) do të kemi stërvitje dhe vetëm atëherë do të përcaktohem se cilët janë ata që do ta fillojnë këtë ballafaqim.

Megjithatë, burimet e gazetës bëjnë të ditur se Prishtina sot kundër Lodz mund të paraqitet në këtë përbërje: Neziri, Haxhaj, Makolli, Sejdiu, D. Krasniqi, B. Krasniqi, B. Ahmeti, A. Ahmeti, Mazrekaj, Zejnullahu e Fetahu. Dy gola të shënuar kundër Petrovacit janë vetëm një nga arsyet që sulmuesi Faton Zejnullahu ta udhëheqë sot sulmin e Prishtinës nga minuta e parë.

“Po ndihem shumë mirë. Në aspektin fizik asnjëherë nuk kam qenë më i përgatitur jo vetëm unë, por edhe shokët e skuadrës dhe jam i bindur se do të vazhdojmë me paraqitje të mirë, natyrisht as golat nuk do të mungojnë”, tha Faton Zejnullahu, dukshëm optimist për ballafaqimin e sotëm kundër skuadrës polake. Prishtina në Ulqin ka mposhtur Tomorin, Lushnjën, Barin, Petrovacin dhe ka barazuar me Çelikun.