Trepça e ka fituar garën me Dritën për ta bërë të vetin mesfushorin e Hysit, Enis Zabërgja. Deri të hënën në mbrëmje futbollsiti vushtrrias ka pasur para vetes dy opsione që kur ishte ndarë papritmas me Hysin javë më parë dhe ishte vetëm çështje kohe kur të vendoste për njërën nga to.

Në fund doli që ekipi mitrvocas ishte më i gjendshëm duke përfituar transferimin e Zabërgjës, pasi që pranoi t’i paguajë 10 mijë euro Hysit, në emër të dëmshpërblimit për mesfushorin.

“Kam qenë para një situate pak delikate për mua. Deri në çastet e fundit kam qenë para Dritës, por gjërat ndryshuan brenda ditës dhe unë përfundova në Trepçë”, tha Zabërgja, duke rrëfyer ngjarjen e orëve të fundit para kalimit në radhët e “xehetarëve”. Ka mjaftuar një telefonatë me presidentin e Trepçës, Nexhmedin Haxhiu, dhe gjithçka ishte e kryer.

“Kam pasur një bisedë telefonike me Haxhiun, i cili për momentin është në Antalia, dhe ajo ka qenë vendimtare, pra që më ka ndryshuar tërë planin, pasi që thuajse isha lojtar i Dritës, me të cilën për dy javë kam qenë në kontakte të vazhdueshme”, shtoi Zabërgja. Nexhi më tha se janë të gatshëm që të paguajnë shumën që po e kërkon Hysi, dhe mua nuk më mbeti asgjë pos që të pranoj ofertën e Trepçës”.

Njëri prej lojtarëve më të mirë në futbollin kosovar tha se e ka pranuar ofertën e ekipit mitrovicas, pasi që ajo mund t’ia mundësojë shumë shpejt kalimin në ndonjë klub të huaj, e që është edhe pjesë e marrvëshjes që ai ka më presidentin Haxhiu, i cili njëherësh është edhe menaxher i lojtarëve.

“Për me ma mbushur mirë mendjen që të bëhem i Trepçës, është edhe mundësia që më ka ofruar Haxhiu, që së shpejti do të më transferojë në ndonjë klub të huaj, e që është edhe dëshira ime në vazhdim të karrierës sime”.

Marrëveshja e arritur të hënën i bën bashkë Zabërgjën dhe Trepçën, deri në vitin 2015, mirëpo me mundësi të shkëputjes nëse lojtari ndërkohë gjen angazhim jashtë Kosovës. Zabërgja është shprehur se i vjen keq që ishte ndarë në këtë mënyrë me Hysin, duke i falëndruar krerët e ekipit llapjan për bashkëpunim.

“Nuk e kam paramenduar një ndarje të tillë me Hysin, por gjërat po ndodhkan edhe në atë mënyrë që nuk e paramendon kurrë. Te Hysi kam kaluar kohë të mirë dhe dua të shfrytëzoj rastin që t’i falendroj ata për të gjitha, gjatë kohës që e kemi kaluar bashkë”, tha Zabërgja, i cili tashmë u është bashkuar stërvitjeve të ekipit mitrovicas dhe do të jetë pjesë e ekspeditës së tij në Antalia të Turqisë, ku ai do të kryejë një pjesë të përgatitjeve dimërore.