FC Prishtina furishëm i ka mbyllur përgatitjet në Ulqin, pasi që të mërkurën e ka demoluar ekipin e elitës së Polonisë, LKS Lodz me rezultat 4:0, në një ndeshje miqësore ndërkombëtare të luajtur në Ulqin. Ekipi bardhekaltër ka mbetur i pamposhtur në Ulqin, ku kishte qëndruar për 12 ditë të plota. Kjo ishte fitorja e pestë për prishtinasit karshi një barazimi.

Ndihmëstrajneri bardhekaltër, Sami Sermaxhaj, është shprehur në superlativ për lojtarët. “Djelmoshat më të vërtetë meritojnë çdo lëvdatë për punën që e kanë bërë dhe rezultatet që i kanë arritur në ndeshjet miqësore. Nuk është pak që cikli i ndeshjeve të zhvilluara në Ulqin të mbyllet pa humbje, kur dihet se për kundërshtarë kemi pasur ekipe të forta”, tha Sermaxhaj. Ekipi prishtinas, sipas tij, ka qenë ekip shumë më i mirë se polakët, që prej fillimit të ndeshjes.

Bardhekaltrit pjesën e parë e kanë mbyllur në favor të tyre me rezultat 1:0, derisa në pjesën e dytë kanë shënuar edhe tre gola të tjerë për ta vulosur fitoren bindëse ndaj ekipit polak. Bile epërsia prishtinase kishte mundur të jetë edhe më e lartë po që se Besnik Krasniqi të ishte preciz nga penalltia, e akorduar në pjesëlojën e parë. Autorë të golave për prishtinasit ishin Enis Fetahu (2) dhe Faton Zejnullahu dhe Besnik Krasniqi.

“Kemi pritur që ta kemi shumë më vështirë me polakët, por doli krejt ndryshe, që ne të jemi ekip që kemi dominuar dhe kemi shënuar fitore, më se të merituar. Lirisht mund të them se kjo fitore është rezultat i gjithë asaj që kemi bërë në përgatitje”, tha Sermaxhaj. Trajneri tha se ky është sinjal i mirë për sfidat që e presin drejt titullit të kampionit. “Të gjithë jemi optimistë se me sukses do t’i kalojmë të gjitha ato sfida që na presin në pranverë, që do të thotë se do t’ia dalim t’i mposhtim të gjithë rivalët në garën e titullit”, tha Sermaxhaj.

FC Prishtina pas ndeshjes ka marrë rrugën e kryevend

rës kosovare, ku do të qëndrojë deri më 18 shkurt, para se sërish të marrë rrugën jashtë Kosovës, për të kryer edhe pjesën përfundimtare të përgatitjeve. “Deri më datën 18 shkurt do të jemi në Prishtinë, ndërkohë që lojtarët si shpërblim nga shefi Jerat do të kenë pushim gjashtë ditë, para se ekipi do të niset sërish jashtë Kosovës për përgatitje”, tha nënkryetari, Afrim Muçiqi.

Ai tha se Ulqini shihet si opsion për të vazhduar përgatitjet. “Ulqini na ka lënë pak ëmbël me të gjitha dhe ekziston mundësia që edhe pjesën tjetër të përgatitjeve ta kryejmë këtu. Nëse jo këtu atëherë si alternativa tjera kemi Maqedoninë dhe Turqinë”.

FC Prishtina në Ulqin përveç LKS Lodz ka mposhtur Tomorin, Lushnjën, si dhe Petrovacin e Barin të Malit të Zi dhe ka barazuar me Çelikun, gjithashtu ekip malazez.