Sulmuesi shkodran i kombëtares shqiptare të futbollit dhe Rapidit të Vjenës, Hamdi Salihi, nuk është larguar nga ekipi austriak në afatin kalimtar të janarit që ka skaduar më 31 janar. Ai në një bisedë për gazetën “Courier” ka sqaruar pozicionin e tij.

“Përherë kam thënë se transferimi im duhet të përkojë më kërkesat sportive, desha të shkoj në Kinë, po kërkova që ata të përmirësojnë ofertën financiare, e cila duhet të jetë vendimtare në këtë rast. Për në Kinë afati kalimtar është i hapur deri më 2 mars, por që kur kam paraqitur kushtet e mia kinezët nuk janë paraqitur”, tha Salihi.

A ka pasur edhe oferta tjera për “the bomber”? “Kam refuzuar oferta nga Greqia, Turqia dhe Qipro, ku ishte një klub i mirë, sepse këto nuk plotësonin kërkesat e mia sportive. Kam ende kontakte me Rangers, por si duket ata kanë vendosur për një sulmues nga Premier League. Pas bisedave me kinezët më duhet të flas me trajnerin e Rapidit nëse duhet t’i bashkohem ekipit në fazën përgatitore në Portugali”.

Ku do të luajë në pranverë Salihi? “Ndoshta në Kinë, por mendoj se më shumë do të rri në Rapid. Më pëlqen klubi, njerëzit dhe qyteti i Vjenës”, tha Salihi.