Ndryshime në Statut, themelimi i shoqatës së klubeve të futbollit të Kosovës, e edhe kërkesa për të bërë më atraktiv futbollin kosovar mund të jenë disa nga kërkesat që do t’i kërkojnë klubet në kuvendin zgjedhor të Federatës së Futbollit të Kosovës (FFK), i cili mbahet të enjten (sot) në Prishtinë.

Udhëheqësit e disa klubeve të Superligës të mërkurën janë shprehur se do të propozojnë ndryshime në kuvendin zgjedhor, me shpresë së ato do të merren parasysh para kolegëve të tyre dhe prijësve të futbollit kosovar.

Drejtori i KF Liria, Hatmi Gashi, tha se do të kërkojë ndryshimin e Statutit të FFK-së sidomos sa i përket kandidimit për president.

“Shumë më mirë do të ishte që në garë për president të ishin 2-3 persona sesa një. Për këtë arsye do të kërkoj që të ndërrohet Statuti dhe që ai në të ardhmen të parashohë që në garë të mos jetë një kandidat, por dy, tre apo më shumë. Do të ishte më demokratike, pasi që delegatët do të kishin para vete më shumë zgjedhje”, tha Gashi.

Numri një i ekipit prizrenas tha se si propozim mund të dalë edhe themelimi i shoqatës së klubeve. “Ne si klub nëse nuk do ta japim propozim për themelimin e shoqatës së klubeve, me siguri se do ta përkrahnim një iniciativë të tillë, pasi që besojmë se kjo do të shkonte në favor të futbollit kosovar dhe do të sjellte edhe ndryshime. Një mundësi e tillë është përmendur para disa muajve, por prej atëherë nuk është diskutuar më për të”, shtoi Gashi, i cili do të jetë njëri prej 59 delegatëve që do të marrë pjesë në kuvendin zgjedhor të FFK-së si përfaqësues i KF Liria dhe rajonit të Prizrenit.

Përfaqësuesi i skuadrës tjetër nga elita e futbollit kosovar, KF KEK-u dhe rajonit të Prishtinës, Istref Klinaku, ka paralajmëruar se do të kërkojë që të ndryshojë diçka në futbollin e Kosovës.

Klinaku e ka ndërmend që të lypë futboll më atraktiv në Kosovë, pasi qe afro 20 vjet ai është i njëjtë. “Është koha e fundit që të ndryshohet diçka, pasi që 20 vjet gjithçka ka mbetur e njëjtë, që e ka bërë futbollin kosovar monoton”, tha Klinaku.

“Do të kërkoj që të gjenden rrugë alternative që futbolli kosovar të njihet ndërkombëtarisht, po ashtu do të kërkoj që të kërkohen mënyra për krijimin e një lige të përbashkët shqiptare”.

Presidenti i elektricistëve gjithashtu është shprehur pro themelimit të shoqatës së klubeve, por edhe që të stimulohen klubet për të vazhduar aktivitetin e tyre.

“Do të kërkoj nga federata që të gjejë sponsor të rinj dhe që të ngrejë shifrën e shpërblimit për kampionin dhe ekipet e tjera. Të themi që shpërblimi për një ekip kampion të jetë së paku 200 mijë euro, e cila me siguri do të shtonte rivalitetin dhe punën nëpër klube, në këtë kohë të izolimit të futbollit kosovar”, tha Klinaku.

Presidenti aktual i FFK-së, Vokrri, ka mbledhur nënshkrimet e gati të gjithë delegatëve të kuvendit duke bllokuar në këtë mundësi përfshirjen e ndonjë kundërkandidati tjetër. Njëjtë është vepruar edhe nëpër lidhjet komunale të futbollit, gjë që ka bërë të pamundur garën për çdo post që do të zgjidhet të enjten në kuvend të futbollit, duke e bërë atë të ditur prej kohës me përfundimin e tij e sidomos njerëzit që do të udhëheqin me futbollin edhe për katër vite të tjera.

Shoqata e klubeve shihet si mundësi më e madhe për organizimin e garave të Superligës, pasi që deri më tani me fondet e mbledhura nga Superliga, siç janë sponsori i ligës dhe shitja e të drejtave televizive, do të organizohej më mirë Superliga dhe që jo një pjesë mjeteve të derdheshin në Federatë, e cila me këto mjete mbulon harxhimet e saj.

Kuvendi i fundit i FFK-së, ai i rregullt, i mbajtur në gusht të vitit të kaluar ka zgjatur më pak se një orë, ku nuk janë diskutuar asnjë nga temat e rëndësishme, mbetet të shihet nëse do të jetë i njëjtë edhe ky kuvend. Një është e sigurt se sikur herën e fundit edhe këtë herë, klubet nuk kanë marrë materialet për të cilat do të diskutojnë, madje disa prej tyre kanë konfirmuar se nuk kishin marrë as ftesën për pjesëmarrje në kuvend.