Erjon Bogdani në orët e fundit të “merkatos” kishte vendosur të kthehej te Siena dhe të lërë Cesenën. Ai është shprehur i kënaqur me këtë kalim.

“Jam i lumtur që arrita të shkoj te Siena. Ky klub ka qenë shumë i rëndësishëm për karrierën time dhe natyrisht që më bëhet qejfi shumë që rikthehem këtu. Kur menaxheri im më lajmëroi se ishte kjo mundësi, pra të firmosja një kontratë me Sienën, për më tepër 18 mujore, ishte një moment i papërshkrueshëm”, tha ai. Madje ai kalimin e krahason me transferimin e parë që kishte bërë drejt Italisë.

“U ndjeva si në ditën e parë që kam ardhur në Itali, te Rexhina 12 vite të shkuara. Sot jam pothuajse 35 vjeç dhe fakti që kam fituar një kontratë të re 18-mujore është një vlerësim i shkëlqyer për mua. Ndjehem shumë i vlerësuar nga Siena”, tha ai.