Ka kohë që i mungon elitës së futbollit kosovar, ndoshta jo me paraqitje të shpeshta sa me golat çfarë ai di të shënojë. Bëhet fjalë për sulmuesin Enis Fetahun, i cili ka vendosur që përsëri t’i kthehet skuadrës së Prishtinës dhe siç thotë “t’i dhurojë shumë gola dhe titullin e kampionit si shpërblim për 90-vjetorin e themelimit të klubit më me nam në futbollin kosovar”.

Paraqitjet e tij gjatë ndeshjeve që Prishtina i ka zhvilluar në Ulqin, japin shpresë se ai mund të kthehet në mënyrë triumfale në Superligë. Goli ndaj Petrovacit e veçmas dy golat ndaj skuadrës polake Lodz, janë vepër të cilën mund të bëjnë vetëm shënuesit e spikatur, e në këtë mjedis gjithsesi është edhe Enis Fetahu. Megjithatë, ka diçka që nuk e lë rehat. Është lëndimi dhe telashet me unaza, të cilat edhe shqetësojnë mjaft dhe janë fajtorë që një kohë ishte jashtë fushës së futbollit.

“Ka momente kur ndihem shumë keq dhe nuk jam në nivelin e duhur. Kështu në ndeshjen miqësore kundër Çelikut të Nikshiqit, nuk mund të qëndroja as në bankinë dhe ishte e pamundur t’i ndihmoja shokët. Mirëpo, duket se stërvitjet po e bëjnë të veten dhe tani po ndihem shumë më mirë, jo vetëm fizikisht, por në çdo aspekt tjetër. Fatmirësisht kam gjetur mirëkuptimin e trajnerit, i cili e ka të qartë problemin tim dhe kjo më jep motiv shtesë që të mos dorëzohem”, tha Fetahu, tejet i kënaqur me pozitën që e luan në skuadër.

“Nga unë kërkohen gola dhe kjo është detyra ime kryesore. Është kjo pozita e cila më së shumti më përgjigjet, të cilën di ta bëj më së miri. Këtë e ka kuptuar me kohë trajneri Jerat dhe për këtë ndihem më i lirshëm në fushë”, thotë dikur futbollisti i skuadrës së njohur kroate NK Zagreb.

Si të gjithë futbollistët e Prishtinës, edhe Enis Fetahu është i kënaqur me përgatitjet e skuadrës në Ulqin dhe me ndeshjet kontrolluese.

“Jemi përgatitur aq mirë sa që lirisht mund të them se për Prishtinën kampionati mund të fillojë sot. Atmosfera është vërtet shumë e mirë, trajneri ka sjellë një frymë të re duke gërshetuar përvojën dhe rininë e futbollistëve, disiplinë të madhe, thjesht një punë profesionale nga trajneri gjerman”, shprehet ish-goleadori i shumë skuadrave kosovare, i cili është shumë optimist jo vetëm për paraqitjet e tij, por edhe të Prishtinës në stinorin pranveror, i cili duhet të nisë me 3 mars.

“Nuk ka dyshim se pa problem do ta ruajmë vendin e parë. Nuk po shoh se kush mund të na ndalë. Madje, jam i bindur se rivalët tanë do të dorëzohen pas javës së pestë të pranverës dhe nuk do t’u japim rast as të bëjnë dallavere”, thotë Enis Fetahu, duke lavdëruar edhe mbrojtjen e Prishtinës, për të cilën thotë se vështirë do të pësojë gola në vazhdim të kampionatit.