Ahmet Kurtolli është njëri nga dy delegatët e FC Prishtina të cilët nuk ishin të pranishëm në kuvendin zgjedhor të FFK-së, i cili u mbajt dje. Nënkryetari i kësaj skuadre kështu e komenton mungesën e tij.

“Së pari rendi i ditës nuk m’u duk i arsyeshëm që unë të jem i pranishëm në kuvend të tillë. Është kjo më shumë ceremoni e servuar më parë në të cilën nuk mund të flitet për zgjedhje korrekte, por kuvend ku mungojnë diskutimet dhe debatet për ta ndihmuar futbollin kosovar që të dalë nga kjo amulli, në të cilën ka kohë që është kapluar. Pa keqkuptime, por ne që japim lekë nuk mund të vijmë aty e t’ia bëjmë aminin një ceremonie të tillë simbolike”, tha Ahmet Kurtolli.

“Si është e mundur që të mos ketë të paktën një kundërkandidat, kur dihet se ekzekutivi ka të drejtë ta propozojë kandidatin edhe pa marr nënshkrimin e delegatëve. Askush nuk duhet t’i frikohet votës”.

Ai nuk e ka të qartë se si është lejuar rizgjedhja e anëtarëve të Komitetit Ekzekutiv në mënyrë të hapur. “Nëse është vendosur që kryetari të zgjidhet me vota të hapura pse është bërë kjo edhe me anëtarët e Komitetit Ekzekutiv, kur dihet se ata vijnë nga Lidhjet Rajonale dhe nuk do të thotë se një rajon i cili e jep pëlqimin për anëtarin e vet, të pajtohet edhe me propozimet nga rajonet tjera”, shprehet Kurtolli, duke mos humbur besimin se një ditë megjithatë gjërat duhet të vijnë në vendin e duhur.

“Mungesa e delegatëve të Prishtinës nuk do të thotë se në të ardhmen nuk do të përpiqemi që gjërat të ndryshojnë për të mirë. Duhet të gjithë ta kenë të qartë se FC Prishtina nuk është kundër një personi pavarësisht se kush është në krye të FFK-së, por kundër dukurive negative në këtë Federatë, kundër një administrate të dobët, në përgjithësi kundër njerëzve të padijshëm”, thotë nënkryetari i FC Prishtina, Ahmet Kurtolli.

B. Berisha