Të gjithë ata të cilët duan që kuvendet e federatave të mos zgjasin shumë, mund t’i marrin shembull kuvendet e Federatës së Futbollit të Kosovës (FFK), qofshin ato të rregullta apo zgjedhore, pasi duket se është bërë e zakonshme që ato të përfundojnë pa e pritur as një orë të plotë.

Kështu ndodhi edhe të enjten (dje) me kuvendin zgjedhor të FFK-së, i cili nisi e përfundoi punën për vetëm 40 minuta, madje me këtë rast fare nuk pati nevojë për kutinë e votimit. Kur kësaj i shtohet fakti se salla “Te Rrethi” ku mbahej kuvendi ishte tejet e ftohtë, doli se për shumë delegatë edhe 40 minutat ishin të gjatë dhe ngushëllimin e vetëm e gjetën në koktejin e organizuar nga FFK-ja.

Kryetarit të Shoqatës së trajnerëve të Kosovës dhe kryetrajnerit të Vëllaznimit, Ajet Shoshollit i takoi hisja që si më i moshuari ta drejtojë kuvendin.

Nga 59 delegatë sa kishin marrë ftesa, të pranishëm ishin 54. Munguan dy delegatët e Prishtinës dhe nga një delegat të Vëllaznimit, Mitrovicës dhe Sharrit. Ashtu siç pritej rendi i ditës u miratua pa asnjë vërejtje dhe kishte të bëjë me zgjedhjen e kryetari të FFK-së dhe anëtarëve të Komitetit Ekzekutiv të FFK-së. Më pas, kandidati i vetëm për kryetar të FFK-së, Fadil Vokrri, doli në foltore dhe u foli delegatëve për planin e ardhshëm katërvjeçar 2012-2016.

Pasi Vokrri tha çka kishte për të thënë, dhe drejtuesi i kuvendit tregoi për mënyrën e zgjedhjes së kryetari të FFK-së, në skenë doli kryetari i Lidhjes Rajonale të Prishtinës, Ismail Ajeti, të cilit sikur nuk i pritej t’ia urojë postin e ri (të vjetër) Vokrrit dhe propozoi që të mos shkohet fare në votim, por që kryetari të zgjidhet me aklamacion. Kjo edhe u bë, kështu që pas 26 minutave Fadil Vokrri u rizgjodh kryetar i FFK-së dhe radha u erdhi duartrokitjeve.

Po ashtu edhe ajo që nuk mund të quhet formë demokratike ishte zgjedhja e Komitetit Ekzekutiv të FFK-së, pasi nuk ishte asnjë emër i ri, por të gjithë të propozuarit nga Lidhjet Rajonale ishin emra që tashmë katër vite janë pjesë e Komitetit Ekzekutiv. Janë këta: Agim Ademi, Xhelal Broja, Bakir Burri, Agim Maloku, Murat Hoxha, Ilaz Mjeku, Luan Vokshi dhe Vjollcë Krasniqi nga futbolli i femrave. Të gjithë këta me aklamacion u rizgjodhën në pozitat që i kishin. Mbetet që Komiteti Ekzekutiv i FFK-së të plotësohet me emrat që do të emërohen nga Vokrri, i cili aty për aty e emëroi vetëm Bekim Haxhiun.

Delegati i Lirisë së Prizrenit, Hatmi Gashi, tha se “në të ardhmen është mirë që kandidati për kryetar të mbledhë maksimalisht 20 nënshkrime në mënyrë që edhe dikujt tjetër t’i jepet rasti për t’u kandiduar për postin e kryetarit të FFK-së”.

Ndërkohë përgjigjen ia dha shumë shpejt sekretari i përgjithshëm i FFK-së Eroll Salihu duke thënës se “shumë shpejtë do të mbahet kuvendi i punës dhe aty mund të propozoni ndryshime, por edhe do të qartësohen zgjedhjet e delegatëve nga Lidhjet Rajonale.

Përfaqësuesi i Dritës kishte vërejtje në punën e Lidhjes rajonale të Gjilanit, veçmas të kryetarit të kësaj lidhje rajonale. Ishte pikërisht ora 16:40 kur kryetari i FFK-së i dha fund kuvendit zgjedhor, nga i cili nuk doli asnjë emër i ri.