Moti i vështirë dhe acari që po mbretëron këto ditë në Kosovë dhe rajon gjithsesi ka vështirësuar edhe përgatitjet e skuadrave për sezonin pranveror, por duket se drejtuesit e klubeve nuk janë befasuar dhe se e kanë pritur një gjë të tillë, kështu që edhe plani i tyre është bërë pikërisht për ditët e ftohta. Temperaturat parashikohet të shkojnë deri në minus 22 gradë celsius dhe ato nuk i kursejnë as futbollistët.

Prishtina është skuadër e vetme që tashmë e ka kryer një faze të përgatitjeve në Ulqin dhe futbollistët janë kthyer që ta vazhdojnë punën në kryeqytet.

“Futbollistët pas kthimit nga Ulqini kanë marrë planin personal të përgatitjeve e që ka të bëjë me pushimin aktiv. Ata janë të ndarë në disa grupe me nga 7-8 futbollistë dhe për punën që bëjnë lajmërojnë përgjegjësin e grupit. Të mërkurën e kemi takimin dhe një stërvitje, kurse nga e enjtja do të nisë cikli i plotë i stërvitjeve”, tha ndihmëstrajneri i Prishtinës, Sami Sermaxhaj.

“Kryetrajneri Jerat e ka bërë planin duke e marrë parasysh motin e vështirë që do të marrë gjatë përgatitjeve. Ne nuk na prishet fare plani pasi gjatë dhjetë ditëve në vijim do të punojmë në objekte të mbyllura”.

Ajet Shosholli është ndër trajnerët më me përvojë në futbollin kosovar dhe raste të tilla kur moti ka qenë i vështirë ka pasur edhe më parë, kështu që kjo nuk duket se e ke befasuar.

“Ne kemi stërvitur me intensitet të shtuar dhe dje e kemi përfunduar këtë ciklus, kështu që nga nesër fillojmë me ciklin e ri. Kemi shfrytëzuar objektet e mbyllura, por edhe hapësirën e hapur, kështu që nuk mendoj se kemi humbur shumë nga ajo që është planifikuar. Këtë e them edhe për faktin se nga fundi i javës presim që të shkojmë në Shqipëri për t’i vazhduar përgatitjet dhe atje do të kemi mundësi për ndeshje të shumta kontrolluese, kur dihet se shumë skuadra tona shkojnë atje në përgatitje”, tha Shosholli, kryetrajner i Vëllaznimit.

Edhe kryetrajneri i Hysit, Afrim Tovërlani, nuk është shumë i brengosur me motin e ftohtë. “Mund të na prishë një ditë të stërvitjeve, por më shumë jo. Ne kemi punuar më shumë në fitnes, Gërmi dhe palestër, duke pushuar një ditë gjatë javës dhe kështu do të vazhdojmë deri nga mesi i muajit kur planifikojmë të shkojmë në përgatitje jashtë Kosovës, sipas të gjitha gjasave në Ohër”.

Për dallim nga Tovërlani, kryetrajneri i Dritës Bekim Isufi ka bindjen se skuadra ka humbur diçka gjatë kësaj kohe, por që do të mundohet ta kompensojë. “Në këto kushte është vështirë të realizohet plani në tërësi. Kemi bërë stërvitje të kombinuara dhe jo monotone, duke improvizuar diçka në objekte të mbyllura. Jashtë është vështirë të punohet me përjashtim të disa vrapimeve në shtigje të gjata. Edhe këtë javë do t’ia bëjmë disi, kurse nga 12 shkurti nisemi për në Durrës, ku do t’i vazhdojmë përgatitjet dhe do ta kompensojmë atë që kemi humbur për shkak të motit të vështirë pasi tashmë është dashur t’i zhvillojmë 4-5 ndeshje kontrolluese”, tha Isufi.

Dy ekipet e tjera të elitës së futbollit kosovar, Besa dhe KEK-u gjithashtu kanë qenë të detyruara të ndryshojnë planin e punës pas kohës së ftoftë dhe dëborës ë madhe që ka rënë javën e fundit në Kosovë. “Kjo kohë e keqe na ka ndryshuar tërë planin e punës. Tërë javën kemi punuar në palestër dhe do të vazhdojmë të punojmë derisa të ndreqet koha. Nuk kemi alternativa të tjera pos kësaj, pasi që nuk kemi mundësi të udhëtojmë diku jashtë”, tha trajneri i Besës, Valdet Shoshi.

Trajneri i KEK-ut, Fetah Veliu gjithashtu shpreson për kohë më të mirë. “Javën e fundit kemi punuar vetëm në palestër, ngase kemi qenë të detyruar ta bëjmë këtë. S’ka kushte që të punohet jashtë. Do të vazhdojmë, megjithë planet që na ka prishur bora e madhe, kështu edhe disa ditë, pasi që ka gjasa që të udhëtojmë jashtë për një pjesë të përgatitjeve. Shpresoj se kjo të mos ndikoj në lojën tonë në pranverë”, tha Veliu.

Lirinë e Prizrenit nuk e pengon as bora e as ftohti që të zhvillojë stërvitjet në terren të hapur. Ata vrapojnë nëpër borë si eskimezët.

“Është shumë ftoftë dhe ka shumë borë, por ne nuk jemi ndalur së punuari jashtë. Pra çdo ditë kemi vrapuar nëpër borë, por në të njëjtën kohë i kemi shfrytëzuar hapësirat e brendshme, pra fitnesin”, tha trajneri i Lirisë, Skender Shengyli. “Njëjtë do të vazhdojmë edhe në të ardhmen pavarësisht kohës, përderisa nuk do të shkojmë në Durrës, ku kemi planifikuar të qëndrojmë së paku 10 ditë”, tha trajneri i ekipit prizrenas.