Sulmuesi prishtinas i ekipit të Australisë, Brisbane Roar, Besart Berisha, reagimin e tij ndaj bashkëlojtarit, James Meyer pas fitores ndaj Central Coast Mariners (2:0) e përshkroi si pasionant.

Shqiptari për herë të dytë brenda pak javësh ka qenë afër konfliktit. Ai më 14 janar, i kishte kërkuar futbollistit të Sydney FC, Pascal Bosschaart qërim hesapesh në tunel, për çfarë ishte suspenduar me një ndeshje moslojë.

Kësaj here me bashkëlojtarin e tij, Meyer pas ndeshjes sërish kishte ardhur deri te një mosmarrëveshje sa që kanë munguar vetëm grushtet, të cilat i ndaluan bashkëlojtarët me ndërhyrjen e tyre.

“Çdo gjë është në rregull ndërmjet nesh”, tha Berisha, duke mohuar që incidenti të ketë lënë gjurmë hidhërimi ndërmjet dy futbollistëve.

Sipas burimeve, mosmarrëveshja lindi për shkak se Meyer kishte akuzuar Berishën se nuk po i përmbahet planit të ekipit, por vetë shqiptari kishte thënë se ai nuk e kishte respektuar.

Vet prishtinasi tha se kjo ishte një mosmarrëveshje tipike ndërmjet dy futbollistëve si pjesë e sportit. “Nuk është kopsht i fëmijëve këtu – ky është futboll dhe për të qenë i suksesshëm duhet të jesh i pasionuar. Ndonjëherë nuk është koha për të qenë miqësor kur luan”, tha Berisha.

Drejtori sportiv i Roar, Paul Trimboli tha se nuk pret nga Federata e Futbollit e Australisë që të ndërmarrë masa ndaj Berishës.

Kapiteni i ekipit, Matt Smith, tha se pasioni i Berishës e ka bërë atë shumë të rëndësishëm në ekip. “Besi lufton me zemër dhe kjo është njëra ndër arsyet pse e duam kaq shumë. Ajo që ndodhi në fushë ka mbetur në të”, tha ai.

27-vjeçari deri tani ka shënuar 11 gola dhe është golashënuesi më i mirë në A League. Roar kampion aktual i Australisë ka ngecur në vendin e tretë në renditjen tabelare me 8 pikë më pak se lideri, Central Coast Mariners. Ndeshjen e ardhshme Brisbane e luajnë si mysafirë i Wellington Phoenix FC.