Njëri ndër portierët më të mirë kosovarë dhe i ekipit suedez, Kalmar FF, Etrit Berisha, vazhdon të jetë i vëzhguar nga shumë skuadra.

Ish-portier i 2 Korrikut së bashku me skuadrën e tij gjendet në Spanjë, ku është në përgatitje për kampionatin e ri i cili në Suedi, Allsvenska fillon në javën e fundit të marsit. Ndonëse gjërat kanë shkuar mjaft mirë, megjithatë është një lëndim i cili po e mundon këtë portier cilësor dhe për një kohë e kishte ndarë nga porta e Kalmarit.

“Tashmë po bëhen katër muaj që nuk mund të ushtroj me intensitet të plotë. Bëhet fjalë për lëndimin e ligamentit të shputës së zogut të këmbës dhe kjo po më shqetëson më së shumti. Tani po ndihem më mire dhe shpresoj se do të jem i gatshëm për edicionin ri.

Pas kthimit nga përgatitjet do ta kem edhe një kontrollim, besoj se do të jetë i fundit dhe do të jem i gatshëm për sfidat që na presin”, tha Berisha, i cili ka kontratë me Kalmarin edhe dy vjet. Skuadra e tij është ndër skuadrat më stabile në futbollin suedez, kështu që edhe në edicionin e ri mëton rezultate të mira.

“Synimi ynë është që të dalim në Evropë, të bëjmë gara në Ligën e Evropës, pra njëra nga katër pozitat e para. Këtë mund ta arrijmë vetëm nëse tregojmë cilësi në kampionatin suedez, ku ka disa skuadra shumë të mira dhe konkurrenca për Evropë është e madhe”. Ai lavdëron punën edhe të shqiptarëve të tjerë në këtë skuadër. “Kanë përparuar shumë dhe tani u mbetet që ta fitojnë rastin për t’u dëshmuar”.

Synimi i portieri Etritit është që një ditë të bëhet pjesë e ndonjë skuadre më të njohur. “Kuptohet se edhe unë kam qëllimet e mia për karrierën e mëtutjeshme e ato lidhen me kalimin në ndonjë kampionat të fortë në Evropë. Edhe pse nuk kisha bërë dallim të madh, mendoj se të ardhmen e shoh në një shtet si Gjermani, Itali apo Holandë”, tha portieri i përfaqësueses së Kosovës.

Muaji qershor është koha kur Etriti ka pushim më të gjatë dhe si zakonisht e shfrytëzon për të ardhur në vendlindje. “Mezi pres të vijë në Prishtinë e të çmallem më të gjithë”, tha Berisha.