Dy futbollistët e Prishtinës, mesfushori Behar Maliqi dhe qendërsulmuesi Suad Saliagiqi, të cilët ka kohë që janë lënduar, me gjasë kësaj jave do t’i nënshtrohen operacionit të gjurit. Derisa Maliqi ka vendosur që operimin ta kryejë në Prishtinë, Suad Saliagiqi do të shkojë në Shkup.

“Pas analizave të bëra dhe kontrollimit të rregullt nuk ka arsye që të shkoj në Shkup. Kam vendosur që të operohem në Prishtinë te dr. Qerim Kida dhe kjo sigurisht do të bëhet gjatë kësaj jave”, tha Maliqi.

Qendërsulmuesi i Prishtinës Suad Saliagiqi ka kohë që është në pritje të shkuarjes për në Shkup pas lëndimit që kishte marrë në fillim të sezonit vjeshtor. “Dje kemi biseduar me mjekun dhe sot përfundimisht do ta marr vesh terminin e saktë dhe është e sigurt që do të shkoj në Shkup për t’u operuar”, tha dje Saliagiqi. Ashtu siç kishin premtuar, drejtuesit e FC Prishtina do t’i heqin shpenzimet e operacionit në të dy rastet.