Duket se nuk ka më dilema që një futbollist i huaj të bëhet pjesë e kombëtares së

Shqipërisë. Bëhet fjalë për futbollistin e AEK-ut, brazilianin Leonardo Rodrigues Perreira.

Burime pranë FSHF-së bënë të ditur se 25-vjeçari, i cili luan si sulmues i dytë, vetë e ka shprehur interesimin për të luajtur me kombëtaren kuqezi. Këtë dëshirë ia kishte shprehur ish-shokut të skuadrës te Levadhiakosi, Alban Bushit, i cili sot mban rolin e menaxherit të ekipit kombëtar.

Dy pjesëtarë të stafit të përfaqësueses kanë qenë në Athinë, ku kanë parë nga afër takimin Olimpiakos- AEK që përfundoi 2:0, ku Leonardo luajti gjithë ndeshjen.

Leonardo është lindur në vitin 1986 në Vila Velha të Brazilit. Ai luan si një sulmues i dytë, ose si mesfushor krahu i avancuar. Braziliani me gjatësi 173 cm e ka nisur karrierën te skuadra e Atletik Paranaense dhe më pas është aktivizuar te Thrasivulos, Levadhiakos. Dy vjetët e fundit ka shënuar 20 gola tek AEK-u.