Në Zhegër të Gjilanit mund të shihen shtëpi të vjetra, të reja dhe në ndërtim, ndër këto të fundit dallohet duke valuar flamuri i FC Baselit, dikush mund të mendojë nga largu se është flamuri shqiptar, por jo, është i ekipit zviceran të futbollit dhe nuk ka të bëjë me ndonjë tifoz të kësaj skuadre, por ai është vendosur në shtëpinë e re që është duke ndërtuar në këtë fshat, Xherdan Shaqiri.

Mesfushori i cili ditë më parë ishte në qendër të vëmendjes së medieve botërore me kalimin e tij te Bayern Munich, ndoshta herën tjetër kur të vijë do të zëvendësojë flamurin e Baselit me atë të Bayern Munichut.

Ekipi bavarez gjithmonë kishte qenë i pëlqyer në vendlindjen e futbollistit, por tashti edhe ata më të flaktit që kishin simpati për ndonjë ekip tjetër, të gjithë janë me Bajernin, ku pritet të luajë bashkëfshatari i tyre.

Xherdanin të gjithë e njohin, bile edhe nga atëherë kur kishte qenë fëmijë, kur sa herë që vinte në vendlindje nga Zvicra, mblidhte djemtë nëpër mëhallë për të luajtur te fusha e sportit afër shkollës së fshatit.

Sokol Zeqiri, që banon jo larg shtëpive të Shaqirajve në Zhegër, tha të se sa herë që e ka parë Xherdanin e ka parë me top. Ai tha se sa ishte fëmijë, Xherdani vinte shpesh në Zhegër e shpesh vjen edhe tash kur është bërë futbollist i madh.

“Të gjithë e kemi ditur se ai një ditë do të bëhet futbollist i madh, ngase e donte futbollin me shpirt, por tash kur Xherdani u bë i Bajernit, na ka bërë krenarë të gjithëve”, tha Zeqiri, pronar i një kafiterie në Zhegër, sipas të cilit tash fshati do të jetë i rregullt në përcjelljen e ndeshjeve të Bajernit e këtë do ta bëjë edhe ai në lokalin e tij, i cili mbushet sa herë që luhen kryendeshjet e mëdha.

Sipas tij, Zhegra gjithmonë e ka dashur Bayernin e ndoshta kjo është pikërisht arsyeja që Xherdani është bërë pjesë e këtij ekipi, e kur flet për futbollistin, ai tha se është i urtë, i qetë, i butë e komunikues me të gjithë.

Familja Shaqiri në Zhegër, në një pronë të përbashkët ka ngritur katër shtëpi, njëra nga të cilat është ende në ndërtim dhe ajo është pikërisht shtëpia e familjes së Xherdan Shaqirit.

Hasan Shaqiri, njëri nga tre xhaxhallarët e Xherdanit, tha se tre nga vëllezërit e tij qysh në rini në kërkim të një jete më të mirë kishin marrë rrugën e kurbetit. Hysen Shaqiri, baba i Xherdanit ka 30 vjet që është në Zvicër e Xherdani, që është i lindur në Zhegër, në Zvicër kishte shkuar në moshën pesëvjeçare.

Edhe babai i Xherdanit kishte qenë futbollist, fillimisht në Zhegër e më pas edhe në Zvicër dhe ai kishte qenë një ndër trajnerët e parë të Xherdanit. Familja Shaqiri gjithmonë e ka dashur sportin dhe, siç tha Hasani, kanë edhe anëtarë të tjerë që do të ndjekin rrugën e Xherdanit.

“Xherdan Shaqiri gjithmonë vetëm futbollin e kishte në mendje dhe qysh në fëmijëri ishte një talent i rrallë, andaj gjithmonë kemi besuar se një ditë ai do të shkojë në një ekip të madh”, tha Hasan Shaqiri, i cili duke folur për nipin e tij, shprehet se edhe pse është futbollist i madh, kurrë nuk le përshtypje të një të riu që ia mban vetes lart, është i shoqërueshëm e tipik djalë shqiptar, i cili e do shumë vendlindjen e vet.

“Gjatë këtyre pushimeve tri herë ishte në Zhegër”, tha Hasan Shaqiri, krenar që nipi i tij do të arrijë majat në Bundesligën gjermane.

Afrim Shaqiri, futbollist i Dritës, djali i axhës së Xherdanit, kishte më pak fat se kushëriri i tij, ngase i cilësuar si futbollist me ardhmëri të ndritur, atë e përcollën disa lëndime, por tashti së fundi edhe ai është rehabilituar dhe po përgatitet me ekipin bardhekaltër nga Gjilani.

Ai tha se e gëzojnë pa masë sukseset e kushëririt dhe ka besim të plotë se ai tërë potencialin që e ka do ta shpalosë edhe më shumë në ekipin e Bajernit. Ai tha se është në kontakt të vazhdueshëm me të, te i cili beson se shumë shpejt do të bëhet yll i Bajernit, ekip me të cilin do të arrijë majën e futbollit evropian.

Edhe Zhegrën e Xherdan Shaqirit e ka mbuluar bora e të ftohtit e madh, në këtë fshat, kudo nëpër ndeja më së shumti përmendet emri i Xherdan Shaqirit, i cili i bën krenarë zhegranët dhe është frymëzim për shumë të rinj që të ndjekin rrugën e tij.