Kalimi i bujshëm i Xherdan Shaqirit nga Baseli tek Bayern Munich nuk ka mbetur pa u theksuar për origjinën e tij nga Kosova edhe gjatë vetë bisedimeve me zyrtarët e njohur të klubit gjerman. Lajmi është konfirmuar nga vëllai i Xherdanit, Erdini, i cili ka qenë ndër negociatorët kryesorë të këtij transferimi historik për futbollin shqiptar.

“Natyrisht se mediat zvicerane dhe ato gjermane e kanë potencuar se Xherdani është nga Kosova dhe madje kanë theksuar edhe vendin e lindjes, Gjilanin, por ajo që na ka bërë më shumë përshtypje është se tema e Kosovës është disktuar edhe gjatë bisedimeve që kemi pasur me zyrtarët e Bayernit”, tha Erdini në një bisedë telefonike për “Zëri”.

“Ata kanë qenë të informuar për prejardhjen tonë dhe madje ishin të informuar edhe për përparimin që ka bërë Kosova, sipas tyre në këtë drejtim ishin informuar edhe nga Beckenbauer, i cili vitin e kaluar qëndroi në Prishtinë. Për Kosovën na foli edhe Ulli Hoenes, kurse në bisedë e sipër u theksua se Kosova duhet të zhvillohet akoma dhe se mund të jetë treg interesant për talente të reja”, tha ai.

Ndonëse Barcelona është klub i preferuar i Xherdan Shaqirit, Bayern Munich tash e dy vjet ka qenë synim i tij për t’u sistemuar. “Para dy viteve ka pasur diçka dhe në planifikim të karrierës kemi menduar se Bayerni është stacioni më i mirë i mundhshëm, për këtë edhe nuk kemi menduar dy herë kur është paraqitur kjo ofertë”, tha ai.

“Kemi pasur kontakte edhe me Galatasaray, Zenit Petersburg, Manchester City, Inter Milan, por gjithmonë me Xherdanin kemi menduar se loja e tij më së miri do të përshtatej te Bayerni”, tha Erdini.

Në dhjetor të vitit 2008, Xherdani ishte paraqitur në grumbullimin e ish-selektorit, Edmond Rugova në afërsi të Baselit, si do të ndodhë kur të pranohet Kosova në UEFA e FIFA. “Po, më kujtohet shumë mirë kjo e para. Për këtë të dytën duhet të presim kur të vijë koha dhe të diskutojmë për atë mundësi, shpresojmë që kjo ditë të vijë sa më parë”.

Në shtator do të jetë ndeshja Shqipëri – Zvicër, e keni diskutuar këtë me Xherdanin. “Prej momentit kur e kemi marrë vesh shortin e kemi diskutuar shumë herë. Shumë njerëz nëpër rrjete sociale shkruajnë gjëra të pavend. Federata Shqiptare e Futbollit nuk u interesua anjëherë për të. E kishim folur se do të reagojmë po qe se na vjen Shqipëria e para, por tani është e pandershme të na akuzojnë. Ne jemi shqiptarë, sigurisht se të ketë emocione, por ai do të paraqitet si në çdo lojë tjetër”, tha vëllai i tij, Erdini.

Në një të afërme të dy vëllezërit do të mundohen të ndihmojnë vendlindjen e tyre. “Nuk harrojmë prej nga jemi dhe do të mundohemi që në një të ardhme të ndihmojmë vendlindjen, qoftë ndonjë klub. Nuk e di e gjithë Zhegra më duket se ishte me Dritën”.