Nuk ka mbetur shumë deri te vazhdimi i kampionatit dhe stinori pranveror në futbollin kosovar, por fushat e mbuluara me borë sikur paralajmërojnë se do të jetë vështirë që pranvera e futbollit tonë të nisë më 3 mars, ashtu siç është marrë vendimi nga Komiteti Ekzekutiv i Federatës së Futbollit të Kosovës.

Kjo mbase ka ndikuar që ekspedita e skuadrës së Prishtinës ende të qëndrojë në kryeqytet, dhe se ende nuk është marr vendim për nisjen në përgatitje jashtë Kosovës.

Kuptohet, nëse shtyhet stinori pranveror, Prishtina sheh mundësinë që disa ditë më vonë të niset për në Antalia, pasi ky vend është opsioni i cili përflitet më së shumti dhe duket se është më i pranueshëm për drejtuesit e FC Prishtina.

Këtë e konfirmon edhe nënkryetari i klubit, Afrim Muçiqi, sipas të cilit, gjatë këtyre ditëve do të vendoset përfundimisht se ku dhe kur shkohet në përgatitje.

Se sa u kushton rëndësi FC Prishtina grupmoshave të reja mbase më së miri tregon fakti se është hapur konkursi për koordinator të Shkollës së Futbollit, si dhe për trajner të futbollit të licencuar nga UEFA, të cilët do të punojnë me grupmoshat e reja me orar të plotë dhe jo të plotë.

“Prishtina është klub i madh dhe gjithnjë synon Evropën. Pavarësisht se për cilën grupmoshë bëhet fjalë, ne po përpiqemi që sa më parë t’i afrohemi futbollit evropian, kështu që çdo risi shkon në këtë drejtim. Kështu, që nga 20 shkurti, trajnerët e skuadrës së parë të Prishtinës do të punojnë edhe me grupmoshat U-17 e U-19, kështu që në të ardhmen do ta kenë më të qartë pasqyrën për futbollistë të cilët marrin sinjalin për të kaluar në kategorinë e seniorëve. Kjo ka bërë që të kërkojmë trajner për grupmoshat më të vogla”, thotë Muçiqi, sipas të cilit rëndësi të madhe do t’i kushtohet edhe çështjes së marketingut dhe për këtë qëllim ky klub kërkon një zyrtar të marketingut.

Siç dihet në shtabin teknik është kyçur edhe gjermani tjetër, Joachim Hopp, i cili ishte pjesë e Prishtinës edhe gjatë përgatitjeve në Ulqin.

Kohëve të fundit është folur shumë edhe për numrin e madh të futbollistëve që janë të pranishëm në këtë klub dhe që ky numër duhet të reduktohet, të paktën për përgatitjet jashtë Kosovës. Për këtë ka folur edhe nënkryetari i FC Prishtina, Afrim Muçiqi.

“Kryetrajneri gjerman Wolfgang Jerat tashmë u ka bërë me dije Fitim Llapashticës, Mehë Ukës, Taulant Halitit e Labinot Shabanit se nuk llogarit në ta, jo se nuk kanë cilësi, por vetëm për shkak të konkurrencës së madhe në skuadër. Të gjithë ata që nuk shkojnë në përgatitje mund të vendosin vetë se a do të jenë pjesë e Prishtinës, apo do të kërkojnë mjedis të ri, pasi kanë kontratë valide me klubin tonë. Ky numër mund të rritet por për këtë vendos Jerat”, tha Muçiqi.