Lojtarët dhe stafi i Bayern Munichut ka shprehur admirim për futbollistin e tyre të ri, Xherdan Shaqiri, që do t’iu bashkohet prej 1 korrikut të këtij viti.

Kapiteni, Philipp Lahm, ka vlerësuar mesfushorin nga Kosova. “Ai ka aftësi të veçanta. Është teknikisht shumë i mirë, i shkathët dhe i depërtueshëm”, tha ai.

“Shaqiri është lojtar i shpejtë që mund të vendosë ndeshjes”, tha mbrojtësi, Holger Badstuber.

“Ai është një talent i veçantë. E kam parë duke luajtur në pjesën ofensive të mesfushës ose në anën e djathtë. Ai kërkon topin dhe këtë e dëshmon me teknikë. Ai e ka atë që duhet për të qenë i madh në Bavaria. Kam përkrahur shumë futbollistë të rinj, edhe Shaqiri do të ketë rastin e tij të dëshmohet”, tha trajneri, Jupp Heynckes.

Por futbollisti nga Zhegra ende nuk është i popullarizuar ndër tifozët. Paul dhe Klaus dy pensionistë që përcjellin ushtrimet e Bayernit, kanë nevojë të mësojnë për të.

“Shaqiri nuk është brazilian por nga Zvicra”, tha njëri. “Jo, ai është zviceran me prejardhje çeke”, tha tjetri.