Bunjamin Shabani, futbollist mesfushor me tipare sulmuese, definitivisht është bërë futbollist i Gjilanit, kurse bashkë me të edhe Valmir Ramadani nga klubi rival lokal Drita, ka kaluar në KF Gjilani. Zyrtarë të KF Gjilani paralajmërojnë se nuk do të rrinë duarkryq dhe se synim vetit i kanë dhënë sjelljen edhe të dy përforcimeve të reja.

Sallah Sherifi, kryetrajner i Gjilanit, tha se shtyrja e kampionatit u ka ardhur në momentin e duhur dhe se kjo i jep kohë KF Gjilani që të përgatitet edhe më shumë. Pikërisht me qëllim përgatitjeje, ekspedita prej 24 futbollistëve do të niset në përgatitjet dhjetëditore në Durrës të Shqipërisë, ku sipas kryetrajnerit Sherifit, është paraparë zhvillimi i një varg ndeshjesh kontrolluese, por edhe kërkesa për së paku edhe dy lojtarë të rinj, me çka do të shtohej fondi i lojtarëve dhe do të rritej konkurrenca për çdo pozitë në klub.

Sipas drejtuesve të KF Gjilani, të gjitha procedurat për Shabanin dhe Ramadanin tashmë janë kryer, ata janë paraqitur në Federatë si pjesë e KF Gjilani dhe ata tashti janë kyçur në përgatitjet që klubi “kuq e bardh” po i zhvillon në Gjilan dhe në hapësirat përreth këtij qyteti.

Gjilani, që për dallim nga vjeshta ka mbetur pa mesfushorin Genc Sermaxhaj, i cili karrierën do ta vazhdojë jashtë vendit, në Bunjamin Shabanin e sheh një zëvendësues të denjë të Sermaxhajt, derisa edhe Valmir Ramadani shihet si përforcim i madh.

Shabani, futbollit nga Maqedonia, ka pasur një karrierë të bujshme në shtetin fqinj në ekipet Skopje dhe Bashkimi, duke veshur edhe petkun e kategorive të reja të Maqedonisë, sikurse që një kohë ka luajtur edhe në Norvegji.

“Shabani është inkorporuar mirë në mjedisin e ri dhe ai bashkë me futbollistët e tjerë po bën përpjekje madhore që të përgatitet sa më mirë për kampionatin që është në prag e ku Gjilanin e pret një luftë e madhe për mbijetesë në elitën e futbollit kosovar”, tha tekniku Sherifi.

Përpos në pasurimin e fondit të lojtarëve, Gjilani është riorganizuar edhe në kryesi, ka bërë ndërrime në shtabin teknik, ku pos kryetrajnerit Sallah Sherifi janë kyçur edhe ndihmësit e tij, Sadullah Ajeti dhe Afrim Ajdini, derisa vërehet se një motiv shtesë po i japin futbollistëve edhe klubi i tifozëve “Skifterat” që janë riorganizuar si asnjëherë më parë.