Mbrojtësi kosovar Ilir Berisha ka nënshkruar kontratë afatgjate me skuadrën suedeze Örebro. Lajmi është konfirmuar në faqen zyrtare të klubit të elitës së futbollit suedez. 20-vjeçari së fundi ka qenë futbollist i FC Prishtinës, ndërsa marrëveshja është arritur pas provave që kaloi te skuadra e tij e re, me ç’rast është paraqitur në tri ndeshje kontrolluese.

“Berisha do të mbajë fanellën me numër 5”, shkruan në faqen e klubit Örebro (www.oskfotboll.se).

Për paraqitjet e mira, 20 vjeçari ka marrë lëvdata edhe nga drejtori sportiv i këtij klubi, Lennart Sjögren. “Ilir është qendërmbrojtës modern, i cili është shumë i kujdesshëm në lojën e tij”, tha Sjögren.

Berisha është rritur në Gjermani, ndërsa në Kosovë është kthyer tek Prishtina ku shumë shpejt zuri vend titullari, para kalimit të Suedi ka pasur edhe një provë te skuadra gjermane, Munich 1860.

Ekipi i Orebros gjendet në kamp stërvitor në Turqi, ndërsa shumë shpejt do të zhvillojë edhe dy ndeshje miqësore. Berisha do të ketë shansin të dëshmojë kualitete edhe ndaj skuadrës ukrainase, Çernomorec Odesa dhe asaj ruse, Toms Tomsk më 25 shkurt.

Te skuadra e Örebro SK tani janë bërë madje 5 futbollistë shqiptarë. Stinorin e kaluar janë paraqitur Valdet Rama, Kushtrim Lushtaku e Denis Abdullahi, ndërsa këtë afat kalimtar skuadrës i janë bashkuar edhe mesfushori Armend Alimi e së fundi edhe Ilir Berisha. Trajner i ekipit të të rinjve të kësaj skuadre është vetë selektori i përfaqësueses së Kosovës, Albert Bunjaki.

Në një prononcim për KNN-në, Bunjaki tha se është i kënaqur që mbrojtësi kosovar Ilir Berisha ka arritur të nënshkruajë kontratë me skuadrën që luan në Supërligën e Suedisë.

“Iliri është lojtar me potenciale të mëdha dhe unë e konsideroj atë si një mbrojtës modern, i cili ka mundësi të arrijë shumë në karrierën e tij. Ai ka shpejtësi të mirë, shkëputjen dhe para së gjithash ka aftësi lideri, pra thjesht është një lojtar shumë i pjekur për moshën 20-vjeçare që ka dhe këtë kam mundur ta vërej në lojën pozicionale që ai bën gjatë ushtrimeve”, tha Bunjaki.

OSK është ekip me traditë 104- vjeçare, është themeluar më 1908, ndërsa në radhët e veta ka edhe futbollistë brazilianë, finlandezë.