Sikurse klubet kosovare, edhe arbitrat kosovarë e kanë zgjedhur Durrësin për të kryer përgatitjet e tyre për testimet që i presin para fillimit të pjesës së dytë të kampionatit të Kosovës. 20 arbitra të Lidhjes Rajonale të Arbitrave të Gjilanit nga dita e enjte do të zbarkojnë në Durrës, ku pritet të qëndrojnë pesë ditë me radhë.

“Ekspedita prej 20 referëve të Gjilanit të enjten do të shkojë në Durrës dhe për pesë ditë do të përgatitet për testimet që i presin para fillimit të pjesës së dytë të kampionatit të Kosovës. Në mesin e atyre referëve që do të shkojnë në Durrës ka referë nga të gjitha kategoritë e futbollit kosovar”, tha kryetari i LRGJGJ-ës Malazog Hoxha.

Qëndrimin në bregdetin shqiptar arbitrat gjilanas do ta realizojnë me mjete vetjake, por një pjesë të shpenzimeve pritet t’i japë edhe Drejtorati për Sport në Komunën e Gjilanit. “Një pjesë referët si zakonisht do ta paguajnë vetë, ndërsa një pjesë tjetër Komuna e Gjilanit”. Kjo është hera e dyte me radhë që arbitrat gjilanas përgatiten në Durrës.

B.D