Ndonëse ka kohë që luajnë në Zvicër dhe mbrojnë ngjyrat e këtij shteti, vëllezërit Granit e Taulant Xhaka asnjëherë nuk e kanë fshehur se Prishtinën e kanë në zemër dhe se janë në gjendje ta ndihmojnë kurdo që të ketë nevojë. Kjo është vërtetuar edhe të martën në një konferencë për shtyp, të cilën në restorant “Prishtina” e mbajtën drejtuesit e FC Prishtina, e ku i pranishëm ishte edhe Ragip Xhaka, babai i Granitit e Taulantit.

Në fakt, ai kishte sjellë nga Zvicra dhuratë për FC Prishtinën, pajisje sportive dhe topa të cilësisë së lartë. “Është kjo dhuratë e madhe për klubin tonë dhe dëshmi se vëllezërit Xhaka dhe babai i tyre nuk e harrojnë Prishtinën dhe se u rrah zemra për klubin tonë pavarësisht se jetojnë në Zvicër”, tha në fillim të konferencës Ahmet Kurtolli, nënkryetar i FC Prishtina.

Më pas fjalën e mori Ragip Xhaka, i cili pasi falënderoi drejtuesit e skuadrës prishtinase tha se “kjo është dhuratë simbolike, por është vetëm fillimi për gjëra më të mëdha, pasi që të tre e kemi Prishtinën në shpirt. Ndihma do të jetë edhe në forma tjera e posaçërisht në krijimin e kushteve për kontakte me klube të Zvicrës e Gjermanisë dhe kjo do të bëhet shumë shpejt”. Edhe nënkryetari tjetër i FC Prishtina, Afrim Muçiqi, falënderoi familjen Xhaka për ndihmën e dhënë.

“Vëllezërit Xhaka kanë premtuar ndihmë dhe këtë tash po e bëjnë. Është mirë që edhe futbollistët e Prishtinës t’i shijojnë pajisjet sportive të cilësisë së lartë me të cilat futbollistët paraqiten në Ligën e Kampionëve dhe garat tjera të mëdha”, tha Muçiqi. Drejtori i Prishtinës Sokol Krasniqi shpreson se “ky bashkëpunim dhe përkujdesje e vëllezërve Xhaka nuk përfundon me kaq dhe se në të ardhmen do ta ndihmojnë futbollin kosovar në çfarëdo mënyrë qoftë ajo”.

Ragip Xhaka ia dorëzoi Kurtollit fanellën si dhuratë e vëllezërve Xhaka, ndërkohë që nënkryetari ia ktheu me një ëmblemë të FC Prishtina. U tha se dhurata përfshin komplet veshje sportive, fanella, 25 topa për stërvitje, 5 topa për lojë dhe pajisje për shtabin teknik. Ragipi premtoi se do të ndihmojë në bashkëpunimin e FC Prishtinës me skuadra të ndryshme evropiane.

“Shumë shpejt FC Prishtina do të ketë bashkëpunim më shumë ekipe evropiane, si Baseli, Grasshopers, Zurichu, e Moenchengladbach”, tha Xhaka duke bërë me dije se ka kontakte me personalitete të rëndësishme në futbollin zviceran e gjerman dhe se avokati i njohur Cristian Lind ka shprehur dëshirë që të kontaktojë me drejtuesit e FC Prishtina. Babai Xhaka foli edhe për planet e Granitit në të ardhmen.

“Janë shumë skuadra të interesuara për të, ndër të cilat edhe Milan, Manchester Utd e Bayern. Skuadra gjermane është duke e përcjellë pothuaj tre vjet dhe pritet që pas ndeshjes do të bisedojnë me Granitin për mundësinë e kalimit në Bayern. Jam i bindur se deri më 31 mars Graniti do të nënshkruajë kontratë me ndonjë klub të njohur”, tha Xhaka.