Basketboll.Turqia nga sot e deri më 12 shtator, do të jetë në qendër të vëmendjes së miliona adhuruesve të basketbollit nga gjithë bota. Në Ankara, Kayseri, Izmir dhe Stamboll, zhvillohet kampionati i 16-të botëror.

Për këtë ngjarje janë bërë investime të madha në infrastrukturën sportive në vlerë mbi 100 milionë dollarë dhe organizatori shprehet se çdo gjë është gati për fillimin e kampionatit.

Investimet e bërë, pritet të kthehen shumëfish, sipas vlerësimit të ekspertëve. Ekonomia e Turqisë, pas botërorit do të jetë më e pasur për 300 milionë dollarë, ndërsa objektet sportive të ndërtuara, do të mbeten në shërbim të sportistëve, biznesit, por edhe imazhi i shtetit turk karshi botës do të sensibilizohet edhe më fuqishëm, ndërsa miliona të rinjve të këtij shteti për sportin e basketboll do të ketë rritje të shumëfishtë.

Organizatori i kampionatit tani do të përkujdeset për mbarëvajtje të garave, ndërsa kombëtaret pjesëmarrëse, gjithë përqendrimin e kanë se si t’i shpalosin vlerat e tyre.

Ekspertët vazhdojnë të lakojnë emrat e kandidatëve më seriozë për titullin e kampionit të botës, por edhe kandidatëve për medalje.

Emri më i favorizuar për medalje të artë është para së gjithash ai i Shteteve të Bashkuara të Amerikës, i kampionit aktual botëror, Spanjës, Argjentinës, por në këtë garë mund të kyçet edhe mikpritësi Turqia, për brezin e së cilës ky është rast historik për t’i sjellë shtetit të tyre medalje që është një mision shumë e vështirë.

Në Turqi, do të garojnë 24 kombëtare nga pesë kontinente, prej tyre 17 sosh këtë të drejtë e kanë fituar përmes garave mënjanuese, ndërsa shtatë të tjera këtë të drejtë e kanë arritur përmes kritereve të tjera.

Turqia si mikpritës Spanja si kampion aktual botëror, SHBA kampion olimpik, ndërsa Gjermania, Libani Lituania e Rusia, e morën ftesë nga FIBA, e cila tradicionalisht dhuron vende për shtetet që nuk janë kualifikuar në botëror.

Prezantimi i Kombëtares së Shqipërisë në një ngjarje të tillë ende është shumë larg dhe duhet pritur edhe shumë vite, ndërsa kërkesa e vetme e FBK-së është pranimi në FIBA.

Andaj, këtë herë në Turqi do të shkojë delegacioni pesanëtarësh i FBK-së, i cili do t’i përcjellë disa ndeshje të këtij botërori, por jo i ftuar nga asociacioni më i lartë botëror.

Ky do të jetë më shumë një udhëtim turistik i delegacionit kosovar. Të shpresojmë që kjo do të jetë hera e fundit që FBK-ja do të jetë jashtë ombrellës së FIBA-së.

Komuniteti shqiptar në këtë botëror do të prezantohet nga eksperti me prejardhje shqiptare, përzgjedhësi i kombëtares së Sllovenisë, Mehmet - Memi Beqiroviqi dhe djali i tij, fundori i kësaj kombëtareje, Sani Beqiroviqi.

Ky është satisfaksion i vetëm dhe shumë vogël, gjithsesi...