Basketboll.Fillimi i kampionatit botëror të basketbollit Turqia 2010, është temë qendrore për shumë adhurues të këtij sporti gjithandej rruzullit.

Për këtë ngjarje ekskluzivisht për gazetën TOPI, flet eksperti i mirënjohur shqiptar i basketbollit, i cili aktualisht është ndihmëstrajner i ekipit të elitës së basketbollit të Turqisë, Efes Pilsen, Ekrem Memnun.

Ai më këtë rast, ka shpalosur opinionin e tij për fillimin e kampionatit botëror, lidhur me favoritët për titullin e kampionit, gjendjen momentale në klubin Efes Pilsen, i cili dje u nis për në Bormio të Italisë, ku do t’i kryejë përgatitje dyjavore. Memnun ka folur edhe për ambiciet e Efesit në edicionin e ri, por edhe për basketbollin kosovar dhe të ardhmen e tij.

“Obligimet shumë të mëdha që i kam me Efes Pilsenin, ku aktualisht jam ndihmëstrajner, nuk më kanë mundësuar që të jam i informuar në mënyrën më të mirë të mundshme mbi formën e kombëtareve pjesëmarrëse në këtë kampionat botëror.Por, për aq sa kam informacione, besoj se kombëtarja e Turqisë do t’ia dalë që të renditet deri në gjysmëfinale, ndërsa favoritë kryesorë për titullin e kampionit do të jenë: Shtetet e Bashkuara të Amerikës, Spanja dhe Argjentina, ndërsa në këtë garë pritet të kyçet edhe Serbia. Por, meqë në këtë kampionat do të mungojnë shumë yje të kombëtareve, unë pres edhe shumë befasi, që do ta bëjnë këtë kampionat shumë më interesant dhe më të paqartë”.

I pyetur se cila është rëndësia e këtij botërori për shtetin e Turqisë, Memnun ka shuar se ai e ka sensibilizuar shumë opinionin në Turqi, do të ndikojë shumë në popullarizimin e këtij sporti te rinia e këtushme dhe është një reklamë shumë pozitive për shtetin e Turqisë në përgjithësi.

Lidhur me gjendjen në klubin momentale në Efes Pilsen, Ekrem Memnun ka thënës se “në këto çaste kur po flasim me telefon me ju, jemi duke shkuar më autobus drejt aeroportit të Stambollit, prej nga do të shkojmë në përgatitje dy javore në Bormio të Italisë.

Siç është e njohur, trajner i ri në Efes Pilsen është eksperti kroat Velimir Perasoviq, ndërsa unë jam ndihmës i tij. Ambiciet e klubit si gjithmonë janë për t’u bërë kampion, por edhe për t’u renditur në Final Foure të Euroligës. Efes Pilsen është duke ndërtuar një ekip të ri, ndërsa konkurrentë kryesorë për titull kampioni sivjet së bashku me ne do të jenë edhe Fenerbahçe Ulker, Gallatasaraji, Beshiktashi, Banvit. Unë pres një kampionat shumë të fortë i cili do të nisë në javën e tretë të muajit tetor".

Ndërsa i pyetur për mikun dhe kolegun e tij Oktaj Mahmutin, i cili është kryetrajner i Gallatasarajit, Ekrem Memun tha se është në kontakte të vazhueshme me të dhe se ai ka një ekip shumë të mirë dhe se Gallatasaraji do të jetë skuadër konkurrente për titull me trajneri Oktaj Mahmuti.

Në anën tjetër, i pyetur për zhvillimet më të fundit në basketbollit e Kosovës, Ekrem Memnun është shprehur se “mospranimi i mëtejmë i FBK-së në FIBA, është një çështje politike, por besoj se Kosova shumë shpejtë do të hynë në FIBA, kurse më pas gjërat do të ecin shumë më mirë”, ka përfunduar Memnun.