Basketboll. Federata e Basketbollit të Kosovës (FBK), është duke mbledhur lobistë që në Kongresin e FIBA-s, i cili do të mbahet në Stamboll më 3 shtator, të përpiqet ta nxisë idenë e futjes në rend të ditës diskutimin e pastaj edhe votimin për anëtarësimin e FBK-së në FIBA.

Herën e fundit, në një takim të FIBA-s, një përfaqësues i FB të Holandës kishte propozuar që FB Kosova të anëtarësohet në Federatën Ndërkombëtare të Basketbollit, mirëpo FB Serbia, me përfaqësuesin e saj Predrag Daniloviq, ka pamundësuar këtë përpjekje, shkruan portali serb, “Alo”.

Dragan Kapiqiç, njeriu i parë i FBS-s, i cili do të merr pjesë në kongresin e FIBA-s, ka marrë sinjale të qarta se FB Kosova në Stamboll do të ketë shumë më shumë mbështetje.

“Nëse dikush propozon të votohet për anëtarësimin e Federatës së Basketbollit të Kosovës në FIBA, dhe deri më tani gjithçka na shtyn të mendojmë se kjo do të ndodhë, do të reagojmë ashpër. Do ta mbrojmë të drejtën ndërkombëtare. Kosova nuk është e pranuar në OKB apo në KNO (Komiteti Ndërkombëtar Olimpik), dhe nëse e shohim të nevojshme, do të thirremi edhe në Rezolutën 1244, e cila i jep një dimension politik. Do të jemi të kujdesshëm veçanërisht këtë 3 shtator, por edhe të vendosur që të mos lejojmë as edhe një precedent basketbollistik. Thënë më saktë, precedent që del jashtë fushës sportive”, ka thënë Kapiqiç për “Alo”.