Basketboll.

Debakël i gjermanëve

Pas fitores së Gjermanisë ndaj Serbisë, me të drejtë është pritur që kjo kombëtare do të bëjë lojëra edhe më të mira, por për këtë u përkujdes Australia, e cila i ka shkaktuar humbje të thellë me rezultat 78:43 (19:7,19:13, 24:11, 16:12), duke arritur dy fitore dhe një humbje.

Se australianët kishin hyrë në këtë përballje për të fituar, kjo u pa që në çerekun e parë kur australianët arritën të përfundojnë dhjetë minutat e parë me rezultat 19:7, por më temp të tillë të lartë luajtën edhe në çerekun dytë dhe të tretë.

Lojtari më i dalluar në radhët e australianëve ishte Patrick Mills me 16 pikë, ndërsa te Gjermania më së shumi pikë ka shënuar Robin Benziry 11 sish.

Në anën tjetër, Serbia në xhiron e tretë pati punë shumë të lehtë kundër Jordansë, të cilën e mposhtën me lehtësi me rezultat 112:69 (33:20, 24:17, 26:11, 29:19).

Në radhët e Serbisë me lojë të mirë janë veçuar Savanoviq dhe Keshel, me nga 21 pikë, ndërsa te Jordania Dagles me 19 pikë.

Serbia ndeshjen e radhës e zhvillon të mërkurën kundër Australisë, ndërsa Irani kundër SHBA-së. Argjentina e ka vazhduar serinë e fitoreve me ndeshjen e mbrëmshme duke mposhtur Angolën me rezultat 91:70. Argjentinasit me tri fitore të njëpasnjëshme i prinë renditjes në Grupin A.

Sllovenët për kujtesë

Ballafaqimi i grupit B midis rivalëve fqinjë Sllovenisë dhe Kroacisë, përfundoi me fitore të sllovenëve me rezultat 91:84 (16:18, 23:26, 26:15, 26:25).

Kjo përballje pa dyshim ishte loja më e mirë e ditës së tretë të këtij botërori. Kombëtarja e Sllovenisë pas një paraqitjeje jo shumë të mirë në dy çerekët e parë, në saje të rritjes së lojës së tyre, veçmas në çerekun e tretë që e bëri trajneri i Sllovenisë me prejardhje shqiptare Memi Beqiroviq, arritën që në minutën 22, ta barazojnë rezultatin 44:44, e më pas edhe të kalojnë në epërsi deri në shtatë pikë dallim.

Këtë rezultat, kanë bërë çmos që ta përmbysin basketbollistët kroatë përmes serisë së jashtëzakonshme prej pesë shënimeve të njëpasnjishme për tre pikë, por kjo nuk i lëkundi sllovenët e motivuar si asnjëherë më parë, të mbështetur fuqishëm nga tifozët e tyre të ardhur në Avdi Ipekçi në Stamboll.

Urosh Slokar dhe Jaka Lakoviç me nga 15 pikë ishin lojtarët më të dalluar te Sllovenia, ndërsa basketbollisti me prejardhje shqiptare Sani Beqiroviq, luajti vetëm dhjetë minuta, shënoi katër pikë dhe pati dy bashkëveprime. Në radhët eKroacisë Roko Ukiç me 20 pikë ishte lojtari më i efektshëm.

Në ndeshjen tjetër të këtij grupi, Irani ka shijuar gëzimin e fitores së parë në këtë botërore ndaj Tunizisë me rezultat 71:58 (23:11, 12:10, 13:22, 22:16), ndërsa për Tunizinë kjo ishte humbja e tretë me radhë. Lojtari më i dalluar te kombëtarja e Iranit ishte Hamed Hadadi me 23 pikë, katër kërcime, ndërsa te Irani u veçua Hamid Bra me 11 pikë.

SHBA edhe në ndeshjen e tretë kundër Brazilit, dëshmuan cilësitë e tyre, ndonëse brazilianët bënë qëndresë të jashtëzakonshme, madje në minutën 32 ia dolën ta barazojnë rezultatin 62:62, por më pas erdhi në shprehje cilësia dhe përvoja e amerikanëve, të cilët në fund ngadhënjyen me rezultat të ngushtë 70:68.

Madje Brazili, tre sekonda para përfundimit pati mundësi të barazojë rezultatin nga gjuajtjet e lira, mirëpo, Leandro Barbosa dështoi në të dy gjuajtjet. Topin e dëbuar nga harku, sërish e zotëruan brazilianët, por dështuan të shënojnë në sekondën e fundit të takimit.