Dy amerikanët Gerald Inman e John Gilchrist, do të jenë pjesë e Sigal Prishtinës në vazhdim të kampionatit në BKT Superligë, pasi ata tashmë janë në kryeqytet.

“Amerikanët tashmë kanë ardhur dhe mund ta konfirmoj se ata janë përforcimet e Prishtinës, me të cilët synojmë që ta mbrojmë titullin e kampionit”, tha drejtori i KB Sigal Prishtina, Artan Rugova.

“Bbëhet fjalë për një lojtar qendër (Inman) dhe një organizator i lojës (Gilchrist), për cilësitë e të cilëve kemi njohuri të bollshme nga menaxherët e ndryshëm, por edhe nga fakti se kanë luajtur basketboll në liga mjaft të forta”, thotë Rugova.

I kënaqur me përforcimet është edhe kryetrajneri Arben Krasniqi. “Ne kemi nevojë për dy basketbollistë të tillë dhe pres që të na ndihmojnë në arritjen e rezultateve dhe synimeve tona si në kampionat ashtu edhe në garat e kupës”, tha Krasniqi, sipas të cilit përgatitjet janë duke shkuar si është më së miri dhe nuk ka telashe serioze.

Basketbollistët e Sigal Prishtinës janë duke vazhduar stërvitjet, por pritet që shumë shpejtë të fillojnë edhe me ndeshje kontrolluese.