Tashmë ka përfunduar afati kalimtar në basketbollin kosovar, ndërkaq klubeve u mbetet që deri në fillim të pjesës së dytë të BKT Superligës t’i shtrëngojnë dhëmbët, në mënyrë që sa më të përgatitur ta presin vazhdimin e një edicioni që paralajmëron spektakël. Kjo për faktin se katërshja e madhe e basketbollit kosovar është përforcuar me basketbollistë të huaj, të cilët do të jenë vendimtarë se kujt do t’i takojë titulli dhe kupa e Kosovës.

Duke mos injoruar basketbollistët vendorë, megjithatë janë “amerikanët” ata që bëjnë dallimin dhe kjo është e qartë për drejtuesit e klubeve, të cilët këto ditë ishin në gjah për të zgjedhur “mall të mirë”, por jo edhe shumë të shtrenjtë. Gjashtë viteve të kaluara kanë dëshmuar se në këtë pikëpamje kryetrajneri i Sigal Prishtinës, Arben Krasniqi nuk kishte konkurrencë në përzgjedhjen e të huajve, kështu që përfundimtaret e disa viteve për prishtinas ishin formalitet pasi gërshetimi i të huajve me basketbollistët vendorë ishte “specialitet” i Krasniqit, me të cilin gjunjëzonte rivalët.

Se çfarë do të jetë në vazhdim të kampionatit mbetet të shihet, por Krasniqi është i kënaqur me përforcimet e Sigalit. “Natyrisht se jam i kënaqur pasi jemi përforcuar me basketbollistë cilësorë dhe mendoj se me këtë fond që kemi mund ta mbrojmë titullin e kampionit, duke mos përjashtuar këtu konkurrentët rivalë të cilët gjithashtu janë përforcuar dukshëm.

Kjo është diçka e mirë për të gjithë pasi e bën kampionatin më joshës, më cilësor dhe me shumë spektakël për çfarë ka nevojë basketbolli kosovar”, thotë Krasniqi, mbreti i padiskutueshëm i trofeve në basketbollin kosovar. Sigal Prishtina përveç amerikanëve John Gilchrist dhe Gerald Inman, që kishte angazhuar kohë më pare, në ditët e fundit ka zyrtarizuar edhe qendrën Ersid Lucën, emër i njohur te ne, me të cilin e kë përmbyllur këtë afta, ndërkohë që rivali i saj më i madh në këtë edicion, Trepça ka angazhuar boshnjakun shtatlartë Emir Zimiç, i cili vjen nga basketbolli grek, por edhe Besnik Azemi i Kosovës në pranverë do t’i mbrojë ngjyrat e Trepçës.

Në radhët e “xehetarëve” është kthyer për të satën here Fikret Hanxhiq, ndonëse është e qartë se jo me cilësinë çfarë e kishte dikur. Peja e Bashkimi kanë mbetur prapa dyshes që e kryeson tabelën në BKT Superligë, por si pejanët edhe prizrenasit shpresojnë të bëjnë “boom” në vazhdim të kampionatit. Kështu, Peja ka angazhuar Dusttin Scot e Mario Edwards nga SHBA-të, por edhe boshnjakun Mirza Ahmetbashiç nga BS Wiena, ndërkohë që Bashkimi përveç me disa basketbollistë vendorë, ka përforcuar radhët edhe me amerikanët, Roland Little e Charles Bronson. Me basketbollistë të huaj janë përforcuar edhe Futura e cila ka angazhuar Milorad Shutulloviqin e Malit të Zi, kurse Kosova, amerikanin Bryant Williams.