Moti i ftoftë që po mbretëron këto ditë në Kosovë, dhe kushtet aspak të përshtatshme nëpër palestrat sportive, janë bërë sebep që Bordi i Federatës së Basketbollit të Kosovës, të marrë vendim për shtyrjen e pjesës së dytë të kampionatit të BKT Superligës.

Siç dihet vazhdimi ishte paraparë për këtë fundjavë, por sipas vendimit të ri, elita e basketbollit tonë garat i vazhdon pas dy jave, pra më 18/19 shkurt. Përveç kësaj, Bordi i FBK-së kërkon nga klubet që sa më parë t’i kryejë obligimet financiare, pasi përveç Sigal Prishtinës, asnjë klub tjetër nuk e ka bërë këtë deri në afatin e paraparë më 30 janar.

Ndërkohë Komisioni për kalime dhe regjistrime në FBK, i ka miratuar të gjitha kërkesat e skuadrave të BKT Superligës për regjistrimin e basketbollistëve të huaj e vendorë, që do të thotë se basketbollistët nuk kanë asnjë kontest nga klubet e mëparshme dhe mund të bëhen pjesë e skuadrave të reja. Tash për tash janë kontestuar dy kalime në konkurrencën e femrave. Bëhet fjalë për basketbollistet Arbnore Perquku dhe Gentiana Ismaili, për të cilat KB”Kastrioti” nuk ka dhënë pëlqim për kalimin e tyre në Sigal Prishtina.